ހުކުރު ދުވަހު ދިން އިންޓަވިއުއެއްގައި ކާޖަލް ބުނީ "ޝައިތާން ސިނަމެޓިކް ޔުނިވާސް" ފުޅާކުރުމުގެ ގޮތުން "މާ" ގެ ސީކުއަލްއެއް އުފެއްދުމުގެ ވިސްނުން ގެންގުޅޭ ކަމަށެވެ. މި ދެ ފިލްމު ގުޅުވާލުމަށްޓަކައި "މާ" ފިލްމުގެ ފަހަތުގައި "ޝައިތާން" ގެ ބިރުވެރި ކެރެކްޓަރު ވަންރާޖްގެ އަޑު ވެސް ވަނީ ހިމަނާފައެވެ.
މި ފިލްމުގެ ސީކުއަލްއާ ބެހޭގޮތުން ވާހަކަދައްކަމުން ކާޖަލް ބުނީ މިކަމުގައި އެންމެ ފަހުގެ ނިންމުން ނިންމާނީ ފިލްމުގެ ޕްރޮޑިއުސަރު އަދި އޭނާގެ ފިރިމީހާ އަޖޭ ދޭވްގަން ކަމަށެވެ. ނަމަވެސް ފިލްމުގެ ފުރަތަމަ ބައިގެ ނިމުން ޝޫޓްކުރިއިރު ކުރިމަތިވި ބިރުވެރި އަދި އުނދަގޫ ތަޖުރިބާތަކުގެ ސަބަބުން ނަފްސާނީ ގޮތުން އަސަރުތަކެއް ކޮށްފައިވާ ކަމަށް އޭނާ އެއްބަސްވިއެވެ.
ބޮލީވުޑްގެ ރިޕޯޓްތައް ބުނާގޮތުން އަޖޭ ދޭވްގަން މިހާރު އަންނަނީ "ޝައިތާން 2" ގެ މަސައްކަތް ކުރަމުންނެވެ. މި އާ ޔުނިވާސް ބިނާކުރަނީ މިހާރު ކާމިޔާބު ކަމާއެކު ކުރިއަށްދާ "މެޑޮކް ސުޕަނެޗުރަލް ޔުނިވާސް" ގެ މޮޑެލްއަށެވެ. މީގެ ބޭނުމަކީ "މާ" ފިލްމުގައި ފެނުނު ސަގާފީ ބިރުވެރިކަމާއި "ޝައިތާން" ގައި ފެނުނު ސިހުރުވެރިކަން އެއްކޮށްލައިގެން ބޮޑު ސިނަމެޓިކް ތަޖުރިބާއެއް ސަޕޯޓަރުންނަށް ގެނެސްދިނުމެވެ.
