މިއީ 2016 ވަނަ އަހަރަށް ފަހު، ގާތްގަނޑަކަށް 10 އަހަރުގެ މެދުކެނޑުމަކަށް ފަހު ޕްރިޔަންކާ އޮސްކާ ސްޓޭޖުން ފެންނާނެ ފުރަތަމަ ފަހަރެވެ. މި މަހުގެ 15 ވާ އާދިއްތަ ދުވަހު ލޮސް އެންޖެލިސްގެ ޑޯލްބީ ތިއޭޓަރުގައި ބާއްވާ 98 ވަނަ އެކަޑަމީ އެވޯޑްސްގެ ޕްރެޒެންޓަރުންގެ ލިސްޓުގައި ޕްރިޔަންކާ ހިމެނިފައިވާކަން އެކަޑަމީން މިހާރު ވަނީ ކަށަވަރުކޮށްދީފައެވެ.
ޕްރިޔަންކާއާ އެކު މި ފަހަރުގެ ހަފުލާގައި އެވޯޑްތައް ހަވާލުކޮށްދިނުމަށް ހޮލީވުޑްގެ ގިނަ ތަރިންތަކެއް ފެނިގެންދާނެއެވެ. އޭގެ ތެރޭގައި "އަޔަން މޭން" ގެ ތަރިން ކަމަށްވާ ރޮބާޓް ޑައުނީ ޖޫނިއާ އާއި ގްވިނެތް ޕަލްޓްރޯގެ އިތުރުން އޭން ހެތަވޭ ވެސް ހިމެނެއެވެ. މި އަހަރުގެ ހަފުލާ ހުށަހަޅައިދޭނީ މަޝްހޫރު ކޮމީޑިއަން ކޯނަން އޯބްރަޔަންއެވެ. މި ފަހަރުގެ އެވޯޑްސްގައި އެންމެ ގިނަ ނޮމިނޭޝަން ހޯދާފައިވަނީ 16 ނޮމިނޭޝަނާއެކު ރަޔަން ކޫގްލާގެ "ސިނާސް" އެވެ.
ޕްރިޔަންކާގެ ބައިނަލްއަގްވާމީ ކެރިއަރު މިހާރު އޮތީ ވަރަށް އުސްމިނެއްގައެވެ. އޭނާގެ އެންމެ ފަހުގެ ފިލްމު "ދަ ބްލަފް" އަށް ބޮޑު ތަރުހީބެއް ލިބެމުންދާއިރު، އޭނާ ދެން އެންމެ އަވަހަށް ފެންނާނީ "ސިޓަޑެލް" ސީޒަން 2 އިންނެވެ. މީގެ އިތުރުން، އިންޑިއާގެ މަޝްހޫރު ޑައިރެކްޓަރު އެސްއެސް ރާޖަމޯލީގެ ފިލްމު "ވާރަނަސީ" އަށް ވެސް ޕްރިޔަންކާ އަންނަނީ ތައްޔާރުވަމުންނެވެ. މި ފިލްމަކީ އެންޓާކްޓިކާގައި ޝޫޓްކުރާ ފުރަތަމަ އިންޑިއާ ފިލްމަށް ވާނެއެވެ.
