އުމުރުން 72 އަހަރުގެ ޖޮއިސް ދުބާއީގައި ތާށިވީ މި މަހުގެ 3 ވަނަ ދުވަހު މުމްބާއީއަށް އަންނަން އޮތް ފްލައިޓް ކެންސަލްވުމާ ގުޅިގެންނެވެ. އޭނާ ބުނީ އުޑުމަތިން މިސައިލްތައް ހުއްޓުވާ (އިންޓަސެޕްޓް ކުރާ) މަންޒަރު އަމިއްލަ ލޮލުން ފެނުނު ކަމަށާއި އެއީ ވަރަށް ބިރުވެރި ވަގުތުކޮޅެއް ކަމަށެވެ.
ޖޮއިސް ދުބާއީގައި ތާށިވެފައި ހުރުމުން މަލައިކާ އާއި އަމްރިތާ އަރޯރާ އަންނަނީ ދުވާލަކު އެތައް ފަހަރަކު މަންމަގެ ހާލު ބަލަމުންނެވެ. މީގެ އިތުރުން ކުރީގެ މިސް ޔުނިވާސް ލާރާ ދައްތަ ވެސް ވަނީ ދުބާއީގައި ޝޫޓިންއެއްގައި ހުއްޓާ ގޮވުންތަކުގެ އަޑު އިވިގެން ސެޓް ލޮކްޑައުން ކުރި ކަމަށް ބުނެފައެވެ.
ދުބާއީގައި ތާށިވި ބައެއް އެހެން ތަރިން މިހާރު ވަނީ ރައްކާތެރިކަމާއެކު އިންޑިއާއަށް ގޮސްފައެވެ. އޭގެ ތެރޭގައި ސޯނަލް ޗޯހާން އާއި އީޝާ ގުޕްތާ ހިމެނެއެވެ. ސޯނަލް ވަނީ އޭނާ އެނބުރި އައުމަށް އިންޑިއާގެ ޕްރައިމް މިނިސްޓަރު މޯދީގެ އެހީތެރިކަމަށް ވެސް އެދިފައެވެ. ނަމަވެސް، މަޝްހޫރު ކުޅިވަރު ތަރި ޕީވީ ސިންދު އާއި ތަމަޅަ އެކްޓަރު އަޖިތު ކުމާރު ފަދަ ތަރިން އަދިވެސް ތިބީ ދަތުރުފަތުރުގެ ދަތިތަކާ ކުރިމަތިލާން ޖެހިފަ އެވެ.
