އޭނާ ހޮސްޕިޓަލުގައި އެޑްމިޓްކުރީ ރޭގެ ވަގުތެއްގައެވެ.
އާއިލާއާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، ހާބުރި ބަލިވެ އުޅޭތާ މިހާރު ދުވަސްކޮޅެއް ވެއްޖެއެވެ. ނަމަވެސް އޭނާގެ ހާލު އިތުރަށް ގޯސްވެ، ހޮސްޕިޓަލުގައި އެޑްމިޓްކުރަން ޖެހުނީ ފުއްޕާމޭގައި ފެންހެދުމުގެ ސަބަބުންނެވެ. އައިޖީއެމްއެޗުން ވެސް ވަނީ އޭނާއަށް އެ ހޮސްޕިޓަލުގައި ފަރުވާދެމުންދާކަން ކަށަވަރުކޮށްދީފައެވެ. އެހެންނަމަވެސް ބައްޔާ ގުޅޭ އިތުރު ތަފުސީލެއް ހޮސްޕިޓަލުން ހާމަކޮށްފައެއް ނުވެއެވެ.
ހާބުރި އަކީ ދިވެހި މިއުޒިކް އިންޑަސްޓްރީގައި 50 އަހަރަށްވުރެ ދިގު މުއްދަތެއްގައި މެދުކެނޑުމެއްނެތި މަސައްކަތްކޮށްފައިވާ ފަންނާނެކެވެ. އަމިއްލަ ހާއްސަ ސްޓައިލެއްގައި ލަވަ ހުށަހަޅައިދޭ ހާބުރި ކިޔާފައިވާ ގިނަ ލަވަތަކަކީ އޭނާ އަމިއްލައަށް ރާގު ހަދައި، ފަރުމާކޮށްފައިވާ ލަވަތަކެކެވެ. އޭނާ ވަނީ ބޮޑުބެރުގެ ދާއިރާއިންނާއި ތަފާތު އަލްބަމްތައް ނެރުމުގައި ވެސް ބޮޑެތި ކާމިޔާބީތަކެއް ހޯދާފައެވެ.
އުމުރުން ދުވަސްވީ ނަމަވެސް އޭނާގެ އަޑަށް ބަދަލެއް ނާންނަކަން، މީގެ އަށެއްކަ އަހަރު ކުރިން ރާއްޖޭގެ މަޝްހޫރު ބޭންޑެއް ކަމަށްވާ "ޑިންބާ މިއުޒިކް" އާއެކު އޭނާ ކިޔާފައިވާ ރެގޭ ސްޓައިލްގެ ލަވަތަކުން ވަނީ ފެނިގެންގޮސްފައެވެ. ދިވެހީންގެ މެދުގައި ބޮޑު މަގުބޫލުކަމެއް ހޯދާފައިވާ ހާބުރިއަށް ހޮސްޕިޓަލުގައި ފަރުވާދެމުންދާއިރު، އޭނާގެ ގިނަ އަދަދެއްގެ ސަޕޯޓަރުން އަންނަނީ އޭނާއަށް އަވަސް ޝިފާއަކަށް އެދި ހެޔޮ ދުއާ ކުރަމުންނެވެ.
