ރާއްޖޭގެ އުތުރުގެ ރަށެެއްގެ މެޖިސްޓްރޭޓް ކޯޓުން ނިންމި މި މައްސަލައަކީ ދެމަފިރިން އެކުގައި އުޅުނުއިރު ފިރިހެން މީހާއަށް ލިބުނު ގޯތި ހަދަން ހަރަދުކުރިކަމަށް ބުނާ ފައިސާ ހޯދަން އަންހެން މީހާ ދައުވާކުރި މައްސަލައެކެވެ.
އަންހެން މީހާ އެދިފައިވަނީ ގެ ހެދުމަށް އޭނާގެ އަތުން ދިޔަ 1،026،440 ރުފިޔާ ހޯދުމަށެވެ. އަދި ފިރިމީހާގެ ގެއިން ބައެއް ހޯދުމަށްވެސް އަންހެން މީހާވަނީ އޭނާ ކުރި ދައުވާގައި އެދިފައެވެ.
މި މައްސަލަ ނިންމާ ކޯޓުން އިއްވި ހުކުގައިވަނީ އެ ފައިސާ އަންހެން މީހާއަށް ދިނުމަށް އަމުރުކޮށްފައެވެ. އަދި އަންހެން މީހާ އެދުނު 1،026،440 ރުފިޔާ ދެ ހަފްތާގެ ތެރޭގައި ދައްކަންވެސް ކޯޓުގެ ހުކުމުގައިވެއެވެ. އެހެންނަމަވެސް އަންހެން މީހާ ފިރިހެން މީހާގެ ގެއިން ބައެއް ހޯދުމަށް އެދުނު ބައިގައި ގޮތެއް ކޯޓުން ނިންމާފައެއް ނުވެއެވެ.
މި މައްސަލާގައި ފިރިހެން މީހާ ޖަވާބުދާރީވެފައި ނުވާތީ ކޯޓުން މައްސަލަ ނިންމާފައިވަނީ ފިރިހެން މީހާގެ ގައިރު ހާޒިރުގައެވެ.
