ވޯލްޑް ކަޕްގެ ގުރޫޕް ސްޓޭޖްގައި އިރާނުގެ ތިން މެޗު ވެސް އޮތީ އެމެރިކާގެ ފަސްގަނޑުގަ އެވެ. އެއީ ޖޫން 15 ގައި ލޮސް އެންޖެލިސްގައި ނިއުޒީލަންޑާ ދެކޮޅަށް، ޖޫން 21 ގައި ބެލްޖިއަމްއާ ދެކޮޅަށް، އަދި ޖޫން 26 ގައި ސިއެޓްލްގައި މިސްރާ ދެކޮޅަށެވެ.
އިރާނުގެ ސުޕްރީމް ލީޑަރު އަލީ ހާމަނާއީ އަވަހާރަވީ ހަނގުރާމަ ފެށި ދުވަހު ދިން ހަމަލާއެއްގަ އެވެ. ހާމަނާއީގެ ބަދަލުގައި އިރާނުން ވަނީ ސުޕްރީމް ލީޑަރުގެ މަގާމަށް އެމަނިކުފާނުގެ ދަރިކަލުން މުޖްތަބާ ހާމަނާއީ އައްޔަންކޮށްފަ އެވެ.
އޭޝިއާގެ ކޮލިފައިންގެ އެއްވަނަ ހޯދައިގެން، ވިދިވިދިގެން ހަތަރުވަނަ ފަހަރަށް ވޯލްޑް ކަޕުން ޖާގަ ހޯދި އިރާންގެ ފުޓުބޯޅަ ފެޑެރޭޝަނުގެ ރައީސް މެހްދީ ތާޖް ވެސް ވިދާޅުވީ، އިޒްރޭލުންނާއި އެމެރިކާއިން ދެމުންދާ ނިރުބަވެރި ހަމަލާތަކުގެ ސަބަބުން، ވޯލްޑް ކަޕާ މެދު ވިސްނައި އުއްމީދުކުރުމަކީ މިވަގުތު ކުރެވެން އޮތް ކަމެއް ނޫން ކަމަށެވެ.
އެމެރިކާގެ ރައީސް ޑޮނަލްޑް ޓްރަމްޕް މިފަހުން ވިދާޅުވީ، އިރާނުން ވޯލްޑް ކަޕްގައި ނުކުޅުނަސް އޭނާއަށް ހެޔޮ ކަމަށެވެ. އެހެން ނަމަވެސް ޓްރަމްޕް އިރާންގެ ގައުމީ ޓީމަށް މަރުހަބާ ކިޔާނެކަމަށް ފީފާގެ ރައީސް ޖިއާނީ އިންފަންޓީނޯ އަންނަނީ ވިދާޅުވަމުން ނެވެ.
އިރާނުން ވޯލްޑް ކަޕަށް ނުދާން ނިންމިއިރު ފީފާއިން އަދި ރަސްމީ އެއްޗެއް މިކަމުގައި ބުނެފައެއް ނުވެ އެވެ.
