އޭނާ ބުނާ ގޮތުގައި އިސްތަށިގަނޑަށް ބޭނުންކުރާ ތަކެތި ހަމުގެ ތެރެއަށް ވަދެ، ވަޅުގަނޑުތައް ބެދުމަށް މެދުވެރިވެ އެވެ. އިސްތަށިގަނޑުގެ ހާއްސަ ޑޮކްޓަރެއް ކަމަށްވާ އަގާ ޓޮމްޕްކިންސް ވެސް ވަނީ މީގެ ބަދަލުގައި ލުއި ބާވަތްތައް ކަމަށްވާ ނިއަސިނަމައިޑް، ލެކްޓިކް އެސިޑް އަދި ޓީ ޓްރީ ނުވަތަ ރޯޒްމެރީ އޮއިލް އެކުލެވޭ ތަކެތި ބޭނުންކުރުމަށް ލަފާދީފަ އެވެ. ޕްރޮޑަކްޓްތައް ގަންނައިރު އޭގައި ހިމެނޭ ބާވަތްތަކަށް ބެލުމަކީ ހަމުގެ ސިއްހަތަށް ވަރަށް މުހިންމު ކަމެކެވެ.
މޫނުގައި އޮށާޅަ ނަގާ މީހުންނަށް ހާއްސަކޮށްގެން ހަމުގެ ޑޮކްޓަރުން ލަފާދޭ ބައެއް ޕްރޮޑަކްޓްސްތަކުގެ ތެރޭގައި "ވެނިކްރީމް ޝޭމްޕޫ" އަދި "ސެރަވީ ޖެންޓަލް ހައިޑްރޭޓިން ކޮންޑިޝަނަރު" ހިމެނެ އެވެ. މިއީ ހަމަށް ގެއްލުން ނުދޭނެ ގޮތަށް އުފައްދާފައިވާ، އޮށާޅަ ނަގާ މީހުންނަށް ވަރަށް ރައްކާތެރި ބާވަތްތަކެކެވެ. މީގެ އިތުރުން ޑޮކްޓަރުން އުފައްދާފައިވާ "ސީން" ބްރޭންޑްގެ ތަކެއްޗާއި، އިސްތަށިގަނޑުން ތެޔޮކަން ކަނޑުވާލުމަށް "ހެޑް އެންޑް ޝޯލްޑާސް" ފަދަ ޝޭމްޕޫތަކަކީ ވެސް ހަމަށް ލުއި އަދި ރައްކާތެރި އެއްޗެހި ކަމަށް އެކްސްޕާޓުން ބުނެ އެވެ.
ހެއާ ޕްރޮޑަކްޓްސްގެ ސަބަބުން މޫނުގައި އޮށާޅަ ނެގުން ހުއްޓުވުމަށް ކުރެވިދާނެ ބައެއް ކަންކަން ވެސް އެކްސްޕާޓުން ކިޔައިދީފައިވެ އެވެ. އެގޮތުން ފެންވަރާއިރު އެންމެ ފުރަތަމަ ބޯދޮވެ، ކޮންޑިޝަނަރު ލުމަށްފަހު އެންމެ ފަހުން މޫނާއި ހަށިގަނޑު ދޮވުމަށް އާދަކުރުމުން، ހަމުގައި ހޭކިފައި ހުންނަ ކެމިކަލްތައް ފިލައިގެން ދާނެ އެވެ. އަދި ނިދާއިރު އިސްތަށިގަނޑު މޫނަށް ނުވެއްޓޭނެހެން އައްސާފައި ބެހެއްޓުމާއި، މޫނާ ކައިރިވާ ހިސާބުތަކުގައި ތެޔޮ ނުލުމަށް ވެސް ޑޮކްޓަރުން ވަނީ އިރުޝާދު ދީފަ އެވެ. މިގޮތަށް އަމަލުކުރުމުން ހަމުގެ މައްސަލަތަކަށް ބޮޑު ހައްލެއް ލިބިގެންދާނެ ކަމަށް ތަޖުރިބާކާރުން ބުނެ އެވެ.
