ވަޒީރު މިހެން ވިދާޅުވީ "އަހާ" ފޯރަމްގައި، ގިރާވަރުފަޅުން ގޯތި ލިބުނު މީހުންނަށް ގޯތި ހަވާލުކުރެވޭނެ ތާރީޚަކާ ގުޅޭގޮތުންނާއި ގިރާވަރުފަޅަށް ބްރިޖު އެޅުމުގެ މަސައްކަތް ބަޔަކާ ހަވާލުކޮށްފައިވޭތޯ އާންމު ފަރާތަކުން ކުރި ސުވާލަކަށް ޖަވާބުދެއްވަމުންނެވެ.
ވަޒީރު ވިދާޅުވީ ތިލަފުއްޓާ ހަމައަށް މިހާރު ކުރިއަށްދާ ގްރޭޓާ މާލެ ކަނެކްޓިވިޓީ ބްރިޖުގެ މަސައްކަތް 2027 ވަނަ އަހަރުގެ ނޮވެމްބަރު މަހަށް ނިންމާލެވޭނެ ކަމަށް މިހާރު އަންދާޒާކުރެވޭ ކަމަށެވެ.
އުތުރުތިލަފަޅާ ހަމައަށް ބްރިޖު ދިގުދަންމާލުމުގެ މަޝްރޫއާ ގުޅޭގޮތުން ވާހަކަދައްކަވަމުން ވަޒީރު ވިދާޅުވީ، އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކް (އޭއައިއައިބީ) މެދުވެރިކޮށް އެ މަޝްރޫއުގެ ފީސިބިލިޓީ ސްޓަޑީ މީގެ ކުރިން ހަދާފައިވާ ކަމަށެވެ. ނަމަވެސް ބޭރުގެ ގައުމުތަކާއި މާލީ އިދާރާތަކުން ލޯނު ހޯދުމުގައި ހުރި ދަތިތަކާ ގުޅިގެން މަޝްރޫއު ކުރިއަށް ގެންދިއުމުގައި ހުރަސްތަކެއް ކުރިމަތިވެފައިވާކަން އެމަނިކުފާނު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، މާ ލަސްތަކެއް ނުވެ މި މަޝްރޫއުގެ ޑިޒައިން މަސައްކަތް ފެށުމަށްޓަކައި ކޮންސަލްޓަންޓުން ނުވަތަ ކަމާބެހޭ ފަރާތްތައް ހޯދުމުގެ މަސައްކަތް ސަރުކާރުން ރަސްމީކޮށް އިއުލާނުކުރައްވާނެ ކަމަށެވެ.
