ބިންވެރިޔާ ސްކީމުގެ ދަށުން މާލެ ރައްޔިތުންނަށް ގޯތި ދޫކޮށްފައިވާ ކ. ގުޅީފަޅުގެ މަގުތަކާއި އެ ރަށުގެ ހިދުމަތްތައް ދިނުމަށް ބޭނުންވާ މުނިސިޕަލް އިމާރާތްތައް އަޅަން ޗައިނާގެ ޗައިނާ މެޝީނަރީ އިންޖިނިއަރިން ކޯޕަރޭޝަން (ސީއެމްއީސީ) އާ ހަވާލުކުރީ މިދިޔަ އަހަރުގެ ޖެނުއަރީ 6 ވަނަދުވަހުއެވެ. އެ މަޝްރޫގެ ދަށުން އެ ރަށިގެ މަގުތައް ހެދުމުގެ އިތުރުން ކަރަންޓު ޑިސްޓްރިބިއުޝަން ނެޓްވޯކް ގާއިމުކުރުމާއި ފެނާއި ނަރުދަމާގެ ނިޒާމުގެ ގާއިމުކުރުމުގެ އިތުރުން ޑީވޯޓަރިން ސިސްޓަމް ގާއިމުކުރުން ފަދަ މަސައްކަތްތައް އެ ކުންފުނިން ކުރަންޖެހެއެވެ. އަދި އޭގެ ކުރިން 2024 ވަނަ އަހަރުގެ ޖެނުއަރީ މަހުގެ 11 ވަނަދުވަހުވެސް ގުޅިފަޅުގެ މަގުތައް ހެދުމަށް ސީއެމްސީއާ އެކު މިނިސްޓަރު މުއްތަލިބް ސޮއިކުރައްވާފައިވެއެވެ.
ރައްޔިތުން މަޖީލީހުގައި ހިމެނޭ އިދިކޮޅު އެމްޑީޕީގެ މެމްބަރަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރު މުއްތަލިބް މިއަދު ވިދާޅުވީ ގުޅިފަޅުގެ މަސައްކަތްތައް ހަވާލުކުރި ޗައިނާގެ ސީއެމްސީ ކުންފުންޏަށް އެކަން ނުވުމުން މިހާރު އެ މަސައްކަތްތައް އާރުޑީސީއާ ހަވާލުކޮށްފައިވާކަމަށެވެ. މުއްތަލިބް ވިދާޅުވީ މަޝްރޫއު ހިންގަން ޗައިނާ ކުންފުންޏަށް ފައިސާ ނުހޯދުނީ ރާއްޖޭގެ މާލީ ހާލަތު އޮތް ގޮތުންކަމަށެވެ.
ސަރުކާރުގެ ވިސްނުމަކީ ބޭރު ކުންފުނިތަކަށް ފައިނޭންސް ނުލިބިގެން މަޝްރޫއުތައް ނުފެށުނުކަމުގައި ވިޔަސް ސަރުކާރުން ބަޖެޓްގެ ތެރެއިންވެސް އެ މަސައްކަތް ކުރުންކަމާށް މުއްތަލިބް ވިދާޅުވިއެވެ.
