ރޭގެ އެއްވުމުގަިއ އަނިޔާވި މީހަކަށް ހޮސްޕިޓަލަށް ގެންގޮސް ފަރުވާދިން މައްމަޒަރު ފެންނަ ވީޑިއޯތަކެއް ވަނީ އާއްމުވެފައެވެ. އަދި އެމީހާއަށް އަނިޔާވީ ފުލުހުން ކަރަންޓް މުގުރު ބޭނުންކުރުމުންކަމަށް އިދިކޮޅު އެމްޑީޕީން ވަނީ ބުނެފައެވެ.
އެވާކަތަކާއި ގުޅިގެން ފުލުހުން މިއަދު ނެރުނު ބަޔާނެއްގައި ބުނީ އެއްވުމެއް ހިނގަމުންދިޔަ ސަރަހައްދަކުން ރޭގެ ވަގުތެްގައި ހޮސްޕިޓަލަށް ގެންދެވުނު މީހަކަށް އަނިޔާވެފައިވަނީ އެއްވުމާއި ގުޅިގެން ފުލުހުން އެޅި ފިޔަވަޅުތަކުގެ ސަބަބުންކަމަށް ބުނެ ފަތުރަމުންދާ ވާހަކަތައް ދިވެހި ފުލުހުންގެ ހިދުމަތުގެ ސަމާލުކަމަށް އައިސްފައިވާކަމަށެވެ.
ފުލުހުން ބުނީ އެއްވުން ކޮންޓްރޯލް ކުރުމަށް ފުލުހުން ހިންގި އެއްވެސް ހަރަކާތަކާއި އެ މީހާއަށް އަނިޔާ ލިބުމާއި ނުވަތަ ހާލު ދެރަވުމާއި ގުޅުމެއް ނުވާކަމަށެވެ.
ދިވެހި ފުލުހުންގެ ހިދުމަތުން ބުނީ ހަގީގަތާއި ހިލާފު ދޮގު މައުލޫމާތު ފެތުރުމުގެ ސަބަބުން ދައުލަތުގެ މުއައްސަސާތަކަށް އޮންނަ އިތުބާރު ކުޑަވެ ރައްޔިތުންނަށް ފޯރުކޮށްދޭ ހިދުމަތްތަކަށް ނޭދެވޭ އަސަރުކުރާކަމަށެވެ. އެހެންކަމުން މައުލޫމާތު ސައްހަކަން ކަށަވަރުކުރުމަށްފަހު މެނުވީ މައުލޫމާތު ނުފެތުރުމަށް އިދާރާތަކަށާއި މީޑިއާތަކަށާއި އާއްމުންނަށް ފުލުހުން އިލްތިމާސްކޮށްފައެވެ.
