ވީރާނާ ވެގެން ހަލާކުވެފައިވާތީ ސަލްޓަން ޕާކު އަލުން ތަރައްގީ ކުރަން އެތަން ބަންދުކުރީ މިދިޔަ އަހަރުގެ އޮގަސްޓް މަހުއެވެ. އޭގެފަހުން ފެށިގެން ތިން މަސް ދުވަހުގެ މުއްދަތަށް ބަންދުކޮށްފައި ބޭއްވުމަށްފަހު މަރާމާތުތައް ނިންމާ ހުޅުވީ މިއަހަރުގެ ފިތުރު އީދު ދުވަހުއެވެ.
ޕާކު ތަރައްގީކޮށް ނިންމާ ހުޅުވިތާ ދެ މަސްވެސް ނުވަނީސް އެތަން އަނެއްކާވެސް މަރާމާތައް ބަންދުކުރަން ނިންމިކަން ހައުސިން މިނިސްޓްރީން މިއަދު ވަނީ އިއުލާންކޮށްފައެވެ.
އެ މިނިސްޓްރީން ބުނީ ސަލްޓަންޕާކު މަރާމާތުކުރުމުގެ މަޝްރޫއުގެ ދަށުން ފުރިހަމަކުރަންޖެހޭ އިތުރު މަސައްކަތްތައް، މިއަދުން ފެށިގެން ކޮންމެ ދުވަހަކު އިރުއޮއްސި 18:00 އިން ފެށިގެން ކުރިއަށް ގެންދިއުމަށް ވަނީ ހަމަޖެހިފައިވާކަމަށެވެ.
އެހެންކަމުން މި މަސައްކަތްތައް ކުރިއަށްދާ ވަގުތުތަކުގައި ސަލްޓަންޕާކު ސަރަހައްދު އާންމުންނަށް ވަގުތީގޮތުން ބަންދުވާނެކަމަށް ހައުސިން މިނިސްޓްރީން ބުނެއެވެ.
ސަލްޓަން ޕާކު މިހާރު އޮތްގޮތަށް ތަރައްގީ ކުރީ ކުރީގެ ރައީސް އަބްދު ﷲ ޔާމީންގެ ވެރިކަމުގައެވެ.
