ރައީސް މުއިއްޒު ވެރިކަމަށް ވަޑައިގެން އެކުލަވާލި 20 މިނިސްޓަރުންގެ ތެރެއިން 10 މިނިސްޓަރު ވަނީ މިދިޔަ މަހުގެ 14 ވަނަ ދުވަހު ކުއްްލިއަކަށްް އިސްތިއުފާދެއްވާފައެވެ. ލޯކަލްް ކައުންސިލް އިންތިހާބުން ސަރުކާރަށް ލިބުނު ނާކާމިޔާބީއާ އެކު އެ ވަޒީރުން މަގާމުން އިސްތިފާދިނީ ރައްޔިތުންގެ ވިންދާ އެއްގޮތަށް ސަރުކާރު ހިންގެވުމަށް ރައީސް ޑރ. މުއިއްޒު ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމުގެގޮތުންކަމަށް ރައީސް އޮފީހުން ވަނީ ބުނެފައެވެ.
10 ވަޒީރުން އިސްތިއުފާ ދިނުމުން އަލުން ވަޒީރުން އައްޔަންކުރައްވާ ސަރުކާރުގެ މިނިސްޓްރީތަކުގެ އަދަދު 15 އަށް ރައީސް މުއިއްޒު ތިރިކުރެއްވިއެވެ.
މިރޭ ދައުލަތުގެ މީޑިއާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ވަޒީރުންގެ މަޖިލިހަށް ގެންނެވި ބަދަލަކީ ރައްޔިތުން ބޭނުންވާގޮތަށް ސަރުކާރުގެ ސިޔާސަތުތައް ތަންފީޒުކުރުމަށް ގެންނެވި މުހިންމު ބަދަލެއްކަމަށެވެ. އެގޮތުން މިހާރު މިނިސްޓްރީތަކުގެ މަސައްކަތްތައް ބަލާއިރު ވަޒީރުން ބަދަލުކޮށް ގެނައި ބަދަލުގެ ހެޔޮ ނަތީޖާ ވަރަށް ރަނގަޅަށް ފެންނަމުންދާކަމަށް ރައީސް މުއިއްޒު ވިދާޅުވިއެވެ.
އަލުން އެކުލަވާލި ކެބިނެޓްްގައި އާ ފަސް ވަޒީރަކު ހިމެނިވަޑައިގަންނަވައެވެ. އެއީ ހެލްތު މިނިސްޓަރު ގީލާ އަލީ އާއި ހެރިޓޭޖް މިނިސްޓަރު ހީނާ ވަލީދާއި އެންވަޔަރަމަންޓް މިނިސްޓަރު އަލީ ޝަރީފްގެ އިތުރުން ފޮރިން މިނިސްޓަރު އިރުތިޝާމް އާދަމް އަދި ޑިފެންްސް މިނިސްޓަރު ހަސަން ރަޝީދުއެވެ. ދެން ތިއްބެވި 10 ވަޒީރަކީ ކުރިންވެސް ކެބިނެޓްްގައި ހިމެނުނު ވަޒީރުންނެވެ.
