ހަލީމް އަވަހާރަވީ އުމުރުން 76 އަހަރުގައެވެ. އޭނާގެ ކަށުނަމާދު އޮތީ މިރޭ މާލޭގެ އާސަހަރާ މިސްކިތުގައި 23:00ގައެވެ.
ރައީސްގެ ތައުޒިޔާގެ މެސެޖުގައި ވިދާޅުވީ، އިބްރާހީމް ހަލީމް ބައި ގަރުނަށްވުރެ ދިގު މުއްދަތެއްގައި ހިދުމަތް ކުރެއްވިއިރު، އޭގެތެރެއިން ބޮޑުބައެއްގައި މަސައްކަތް ކުރެއްވީ މުލިއާގޭގައި ކަމަށެވެ.
ކުރީގެ 6 ރައީސުންނާއެކު މަސައްކަތް ކުރައްވާފައިވާއިރު، އިބްރާހީމް ހަލީމް ދިވެހި ދައުލަތަށް ހިދުމަތްކޮށްދެއްވީ އިހުލާސްތެރި ކަމާއެކު ކަމަށް ރައީސް ވިދާޅުވި އެވެ.
އޭނާ ސަރުކާރުގެ ހިދުމަތް ފެށްޓެވީ، 5 ޖުލައި 1971 ގައި އެޓާނީ ޖެނެރަލްގެ އޮފީހުގެ ޕިޔޯނެއްގެ ވަޒީފާއިންނެވެ. އޭގެފަހުން، ޕްރައިމް މިނިސްޓަރުގެ އޮފީހާއި، ގަވަންމަންޓް ހޮސްޕިޓަލާއި، ރައީސްގެ އޮފީހުގެ ޕިޔޯނުކަން ކުރައްވައިފައި ވެއެވެ.
ހިދުމަތުގެ އަގުވަޒަން ކުރެއްވުމުގެ ގޮތުން ދިވެހި ދައުލަތަށް ހިދުމަތް ކުރުމުގެ އިނާމު އެމަނިކުފާނަށް ވަނީ، ލިބިވަޑައިގެންފަ އެވެ.
