ޓްރަމްޕް ވިދާޅުވީ، އެއްބަސްވުމަކަށް އައުން ފިޔަވައި އީރާނަށް "އިތުރު އެހެން ގޮތެއް ނެތް" ކަމަށެވެ. މީގެ ކުރިން ޓްރަމްޕް ވަނީ ހަނގުރާމަ ކުރުމުގެ ގާބިލްކަން އީރާންގެ ކިބައިން މުޅިން ނައްތާލާފައިވާ ކަމަށް ތަކުރާރުކޮށް ވިދާޅުވެފަ އެވެ.

ފެބުރުވަރީ 28 ގައި އިޒްރާއީލު ރުއްސުމަށް ޓްރަމްޕް ފެށްޓެވި ހަނގުރާމަ ނިމުމަކަށް ގެނައުމުގެ ގޮތުން ވޮޝިންޓަނާއި ތެހްރާނުން މިހާރު ދަނީ މަޝްވަރާކުރަމުންނެވެ. މި ވަގުތު ދެ ފަރާތުގެ މެދުގައި އޮތް އެންމެ ބޮޑު ނުތަނަވަސްކަން ގުޅިފައިވަނީ އީރާނުން މުއްސަނދިކޮށް، ރައްކާކޮށްފައިހުރި ޔުރޭނިޔަމްއާ އެވެ. 

އެމެރިކާގެ ރައީސް ޑޮނަލްޑް ޓްރަމްޕު -- ފޮޓޯ: އޭއެފްޕީ

ޓްރަމްޕް ކުރިން ވިދާޅުވަމުން ގެންދަވަނީ އެ ތަކެތި އެމެރިކާއިން އަތުލައިގަންނާނެ ކަމުގަ އެވެ. ނަމަވެސް، އެ ސިޔާސަތު ބަދަލުކުރައްވައި، ޓްރަމްޕް އެންމެ ފަހުން ވިދާޅުވީ، ދެ ފަރާތުން އެއްބަސްވާ ތަނަކަށް އެ ތަކެތި ގެންގޮސް، ނައްތައިލުމަށް އެއްބަސްވާން ވޮޝިންޓަނުން ތައްޔާރަށް އޮތް ކަމުގަ އެވެ.

އީރާނާއެކު ސުލްހައިގެ ވާހަކަތަކުން އެމެރިކާއަށް ކުރިއެރުން ނުލިބެނީ އެމީހުންގެ ދަހިވެތިކަމާއި އަމަލާއި ބަހާ ދިމާނުވާތީ ކަމަށް އީރާން މީޑިއާތަކުން މިފަހުން ވަނީ ބުނެފަ އެވެ. ޓްރަމްޕް ވަނީ އެމެރިކާ އެދޭ ހުރިހާ އެދުންތަކަށް އީރާން ދީލާލައިފާ ވާކަމަށް ބުނެ އެތައް ފަހަރަކު ވާހަކަ ދައްކާފައެވެ. އީރާންވަނީ ޓްރަމްޕް ހަދަނީ ކަނޑައެޅިގެން ދޮގުކަމަށާއި ޓްރަމްޕްގެ ދޮގުތަކަށް ރައްދުދިނުމަކީ ވަގުތު ބޭކާރު ކުރުންކަމަށް ސިފަކޮށްފަ އެވެ.

އެމެރިކާއާއި އީރާނާ ދެމެދު ހިނގަމުންދާ ހަނގުރާމައިގެ ސަބަބުން، ދުނިޔޭގެ އެކި ކަންކޮޅުތަކުގައި ދިރިއުޅޭ އެތައް މިލިއަން ބަޔަކު ކާބޯތަކެތީގެ ބޮޑު ކާރިސާއަކާ ކުރިމަތިލާން ޖެހިދާނެ ކަމުގެ އިންޒާރު އދ. އިން މިހާރު ވަނީ ދީފަ އެވެ.

މެދުއިރުމަތީގައި އުފެދިފައިވާ މި ނުތަނަވަސްކަން ހައްލުކުރުމަށް ބައިނަލްއަގުވާމީ މުޖުތަމައުން މަސައްކަތްކުރަމުން ދިޔަ ނަމަވެސް، ހަމަލާތައް މެދުކަނޑާލުމާ ގުޅޭގޮތުން އަދި ވަކި ގޮތެއް ނިންމިފައެއް ނުވެ އެވެ. އދ. އިން ވަނީ އިންސާނީ އެހީތެރިކަން ފޯރުކޮށްދިނުމަށްޓަކައި ވަގުތުން ހަނގުރާމަ ހުއްޓާލުމަށް ގޮވާލާފަ އެވެ.