އެމެރިކާއިން ދަތިކުރުމުގެ ފިޔަވަޅު އަޅާފައިވާ އުޅަނދަށް އެމެރިކާގެ ހެލިކޮޕްޓަރުތަކެއް ޖައްސަނީ: ކަނޑުމަތީގެ ޕެޓްރޯލެއްގައި އުޅެނިކޮށް އީރާުނުން އެމެރިކާގެ އަޕާޗޭ ހެލިކޮޕްޓަރެއް ވައްޓާލާފައިވާ ކަމަށް ވަނީ ބުނެފައި. - ފޮޓޯ: އިންޑީޕެކޮމް

އެމެރިކާއިން ވަނީ ކަނޑުއޮޅިން ދަތުރުކުރާ ބޯޓުފަހަރަށް އަސްކަރީ ހިމާޔަތް ދިނުމުގެ އޮޕަރޭޝަނެއް މެއި މަހުގެ ކުރީކޮޅު "ޕްރޮޖެކްޓް ފްރީޑަމް" ގެ ނަމުގައި ފަށައިފަ އެވެ. ނަމަވެސް، އެންމެ ދުވަހަކަށްފަހު އެ މަސައްކަތް އެމެރިކާ އަސްކަރިއްޔާއަށް "ނުވެގެން" ހުއްޓާލި އެވެ.

ފެބްރުއަރީ 28 ގައި އެމެރިކާ އާއި އިޒްރޭލުން އީރާނަށް ދިން ހަމަލާތަކާ އެކު ފެށުނު މި ހަނގުރާމައިގެ ސަބަބުން، ދުނިޔޭގެ ބާޒާރުގައި ތެލާއި ގޭހުގެ އަގު ވަނީ އިންތިހާއަށް އުފުލިފަ އެވެ. އަދި ހަކަތަ އިމްޕޯޓްކުރާ އޭޝިއާގެ ގައުމުތަކަށް ތެޔޮ ލިބުމުގެ ދަތިކަން ކުރިމަތިވެދާނެ ކަމުގެ ބިރު ވަނީ ބޮޑުވެފަ އެވެ.

މިދިޔަ ހަފުތާގައި ޔޫރަޕުގެ ބައެއް ގައުމުތަކުގައި ޑީސަލްގެ އަގު ވަނީ 1985 ވަނަ އަހަރުގެ ފަހުން އުފުލު އެންމެ މައްޗަށް އަރައިފަ އެވެ. މިއީ 2022 ވަނަ އަހަރު ރަޝިޔާއިން ޔޫކްރެއިނަށް އަރައިގަތް ދުވަސްވަރު އަގުތައް އުފުލުނު މިންވަރަށް ވުރެ ވެސް މަތީ އަދަދެކެވެ.

ބްރެންޓް ކްރޫޑްގެ އަގު ފީފާއަކަށް 2.30 ޑޮލަރު ނުވަތަ 2.47 އިންސައްތަ މައްޗަށް ގޮސް، އަގު ވަނީ މިއަދު 95.42 ޑޮލަރަށް އަރާފަ އެވެ. އަދި އެމެރިކާގެ ވެސްޓް ޓެކްސަސް އިންޓަމީޑިއަޓް ކްރޫޑްގެ އަގު ފީފާއަކަށް 2.62 ޑޮލަރު ނުވަތަ 2.89 އިންސައްތަ މައްޗަށް ގޮސް، 92.63 ޑޮލަރަށް ވަނީ އުފުލިފަ އެވެ.

ތެލުގެ އަގު އުފުލެން މި ފެށީ އީރާނާއި އެމެރިކާއާ ދެމެދު ސުލްހައިގެ މަޝްވަރާތަކުގައި ވަރަށް ބޮޑެތި ކުރިއެރުންތަކެއް ލިބި މިހާރު އޮތީ ފަހު މަރުހަލާގައި ކަމަށް ޓްރަމްޕު ވިދާޅުވެފައި ވަނިކޮށެވެ. 

އާންމުންގެ ޕްރެޝަރު ބޮޑުވަމުންދާތީ، ގިނަ ގައުމުތަކުން މިހާރު އަންނަނީ ހަކަތައިގެ އަގު ކޮންޓްރޯލް ކުރުމަށާއި އާންމުންނަށް ލުއި ދިނުމަށް އެކި ފިޔަވަޅުތައް އަޅަމުންނެވެ. މިކަމުގެ ގެއްލުން ގައުމުތަކުގެ އިގްތިސޯދަށް އަންނަނީ ކުރަމުން ނެވެ. ހާއްސަކޮށް ވައިގެ ދަތުރުތަކަށް ވަނީ ބޮޑު ލޮޅުމެއް އައިސްފަ އެވެ.