މިހާރަކަށް އައިސް ކުދިން މާ ގޮތްދޫނުކޮށް، ބަސްނާހާ މައްސަލައަކީ ގިނަ ބެލެނިވެރިންގެ އޮންނަ ބޮޑު ޝަކުވާއެކެވެ. ކުރީގެ ކުދިންނާ އަޅާބަލާއިރު މިހާރުގެ ކުދިން ބޭނުންވާ ކަމެއް ނުވެއްޖެނަމަ ބޮޑާދެއްކުމާއި، ރުޅިއައުން ފަދަ ކަންކަން އިތުރުވެފައިވާ ކަމަށް ގިނަ ބަޔަކު ގަބޫލުކުރެ އެވެ. ނަމަވެސް، ކުދިންގެ މިފަދަ އުޅުމުގެ ފަހަތުގައި ބެލެނިވެރިންނަށް ނޭނގޭ ވަރަށް ބޮޑެތި ނަފްސާނީ ސަބަބުތަކެއް ހިމެނޭ ކަމަށް ދާއިރާގެ ތަޖުރިބާކާރުން ހާމަކުރައްވަ އެވެ.
Advertisement
ކުދިންގެ ނަފްސާނީ ދާއިރާގެ މަޝްހޫރު ތަޖުރިބާކާރެއް ކަމަށްވާ ޑރ. ކޯނީ ހެޕްނާ ވިދާޅުވީ، ކުދިން ގޮތްދޫނުކުރުމަކީ ހަގީގަތުގައި އެކުދިންގެ އަމިއްލަ މިނިވަންކަން ދައްކަން ކުރާ ކަމެކެވެ.
"ކުދިން ގޮތްދޫނުކޮށް ބޮޑާދައްކަނީ އެކުދިންގެ ދިރިއުޅުމުގެ ކަންކަން އަމިއްލައަށް ކޮންޓްރޯލް ކުރަން ބޭނުންވާތީ. މިއީ ކުއްޖާ ބޮޑުވަމުން އަންނައިރު އޭނާގެ އަމިއްލަ ޝަހުސިއްޔަތު ބިނާކުރުމަށް ކުރާ ކަމެއް،" ކަމަށް އޭނާ ވިދާޅުވިއެވެ.
އެހެންކަމުން މިއީ ކުއްޖާ ގަސްތުގައި ކުރާ ނުބައި ކަމެއްގެ ގޮތުގައި ދެކިގެން ނުވާނެ އެވެ.
މީގެ އިތުރުން، މިހާރުގެ ކުދިންގެ އުޅުމަށް އަންނަ ބަދަލުތަކުގެ އެންމެ ބޮޑު އެއް ސަބަބަކީ ސްކްރީން ޓައިމް ނުވަތަ ފޯނާއި ޓެކްނޮލޮޖީއަށް ދެވޭ ވަގުތު އިތުރުވުމެވެ. ކުދިންގެ ތަރުބިއްޔަތާއި އުޅުމާ ބެހޭގޮތުން ލިޔުންތައް ލިޔުއްވާ މަޝްހޫރު މުސައްނިފު އެމީ މޯރިން ވިދާޅުވީ، ސްކްރީންތަކުގެ ސަބަބުން ކުދިންގެ ކެތްތެރިކަން ކުޑަވާ ކަމަށެވެ.
"ފޯނާއި ގޭމްތަކުން ކުދިން ބޭނުންވާ ކަންކަން ވަގުތުން ވަގުތަށް ފުރިހަމަވޭ. އޭގެ ސަބަބުން ހަގީގީ ދިރިއުޅުމުގައި ކަމެއް ނުވެ ލަސްވުމުން، އެކަމަށް ކެތްކުރަން އެކުދިންނަށް އުނދަގޫވަނީ،" ކަމަށް އޭނާ ވިދާޅުވި އެވެ.
މިކަމާ ގުޅޭގޮތުން ދުނިޔޭގެ މަޝްހޫރު ޗައިލްޑް ސައިކޮލޮޖިސްޓް ޑރ. ލައުރާ މާކަމް ވިދާޅުވީ، ކުދިން ގޮތްދޫނުކޮށް ރުޅިއަންނަ އަސްލު ސަބަބަކީ ބެލެނިވެރިންނާ އޮންނަ ގުޅުން ކުޑަވުން ކަމަށެވެ.
"ކުދިން ބަސްއަހަނީ ބެލެނިވެރިންދެކެ ބިރުންނެއް ނޫން. އެކުދިން ބަސްއަހަނީ ބެލެނިވެރިންނާ އޮންނަ ގާތް ލޯބީގެ ގުޅުމުގެ ސަބަބުން. އެ ގުޅުން ކުޑަވުމުން ކުދިން ގޮތްދޫނުކުރަން ފަށާ،" ކަމަށް އޭނާ ވިދާޅުވި އެވެ.
އެހެންކަމުން، ކުދިން މާ ގޮތްދޫނުކޮށް އުޅޭނަމަ ހަރުކަށި އަދަބުދީ މައްސަލަ ބޮޑުކުރުމުގެ ބަދަލުގައި، އެކުދިންނަށް ވަގުތުދީ ވާހަކަދެއްކުން މުހިންމެވެ. ކުދިންގެ އިހުސާސްތައް އަޑުއަހައި، ލޯތްބާއެކު ކަންކަން ވިސްނައިދިނުމަކީ މިހާރުގެ ކުދިންގެ އުޅުން އިސްލާހުކުރުމަށް އޮތް އެންމެ ރަނގަޅު ހައްލެވެ.
