ލަންކާ އެތުކަންދުރާ އަށް ނިސްބަތްވާ މި މީހާއަކީ، މިދިޔަ ފެބްރުއަރީ 13 ވަނަ ދުވަހު އަކުރެގޮޑާ ސަރަހައްދުގައި، ގާނޫނީ ވަކީލަކަށާއި އޭނާގެ އަންހެނުންނަށް ބަޑިން ހަމަލާދިން މައްސަލައަކާ ގުޅިގެން ހޯދަމުންދިޔަ މީހެކެވެ. އަދި މި މީހަކީ ވަކީލްގެ ދެމަފިރިންނަށް ހަމަލާދިން މީހުންނަށް ދަތުރުފަތުރުގެ ކަންކަން ހަމަޖައްސައިދިން ކަމަށް ތުހުމަތުވާ މީހާ އެވެ.
ލަންކާ ނޫސްތައް ބުނާ ގޮތުން އުމުރުން 23 އަހަރުގެ މި މީހާ ރާއްޖޭގައި އުޅެނިކޮށް ވަނީ ހައްޔަރުކޮށްފައެވެ. އަދި އެމީހާ ރާއްޖެއިން ފޮނުވާލުމުން ލަންކާގެ ކްރިމިނަލް އިންވެސްޓިގޭޝަން ޑިޕާޓްމަންޓް (ސީ.އައި.ޑީ) ގެ އޮފިސަރުން ވަނީ ހުކުރު ދުވަހު ބަންޑާރަނައިކަ އިންޓަނޭޝަނަލް އެއާޕޯޓަށް އެމީހާ ފޭބުމުން ހައްޔަރުކޮށްފައެވެ.
ގާނޫނީ ވަކީލާއި އޭނާގެ އަނބިމީހާ މަރާލީ ކޮލަމްބޯއާ 12 ވަރަކަށް ކިލޯމީޓަރު ދުރުގައި އޮންނަ އަމަލު ތަލަންގަމާގެ އަކުރެގޮޑާގަ އެވެ. ބަޑި ޖަހާފައި ވަނީ ސުޕަމާކެޓެއްގެ ޕާކިން އޭރިއާގައި އޮތް ކާރެއްގެ ތެރޭގައި ދެމަފިރިން ތިއްބައެވެ.
