މީގެ ދެ މަސް ކުރިން ތައިލޭންޑުން ވަނީ ދިވެހީންނަށް ވިސާއާ ނުލައި އެ ގައުމުގައި ތިބެވޭނީ ގިނަ ވެގެން 15 ދުވަހަށް ކަމަށް ނިންމައިފަ އެވެ. ނަމަވެސް އެ އުސޫލަށް މި ވަނީ ލުއި ދީފަ އެވެ.
ތައިލެންޑު ކެބިނެޓުން އިއްޔެ ނިންމީ 93 ގައުމުގެ ފަތުރުވެރިންނަށް ވިސާއާ ނުލާ ތިބެވޭ ގޮތަށް ދޭ 60 ދުވަހުގެ މުއްދަތު އުވާލުމަށެވެ. ވިސާއާ ނުލައި 60 ދުވަހަށް ތިބެވޭ މުއްދަތު އުވައިލި ނަމަވެސް، ކެބިނެޓުން ނިންމީ 59 ގައުމެއްގެ ފަތުރުވެރިންނަށް ވިސާއާ ނުލައި ތިބެން 30 ދުވަހުގެ މުއްދަތެއް ދިނުމަށެވެ. އެ ގައުމުތަކުގެ ތެރޭގައި ރާއްޖެ ވެސް ހިމެނެ އެވެ.
ވިސާގެ އުސޫލުތަކަށް ގެނައި މި ބަދަލުތަކަށް އަމަލުކުރަން ފަށާނީ، ތައިލެންޑުގެ ރޯޔަލް ގެޒެޓުގައި ޝާއިއުކުރާތާ 15 ދުވަސް ފަހުންނެވެ. ނަމަވެސް، މި އާ ގަވާއިދުތަކަށް އަމަލުކުރަން ފެށުމުގެ ކުރިން ތައިލެންޑަށް އެތެރެވެފައިވާ ބިދޭސީންނަށް، އެ މީހުންނަށް ފުރަތަމަ ދޫކޮށްފައިވާ ހުއްދައިގެ މުއްދަތު ހަމަވަންދެން އެ ގައުމުގައި ތިބެވޭނެ އެވެ.
