ފީފާ ސަތާރަ އަހަރުން ދަށުގެ އަންހެން ވޯލްޑްކަޕް މުބާރާތް ބާއްވާން ފުރަތަމަ ނިންމާފައިވަނީ މި އަހަރުގެ ނޮވެމްބަރު މަހުގެ ދެވަނަ ދުވަހުން ފެށިގެން އެކާވީސްވަނަ ދުވަހުގެ ނިޔަލަށެވެ. އިންޑިޔާގެ ފަސް ސަރަހައްދެއްގައި މުބާރާތް ކުރިއަށް ގެންދަން ނިންމާފައިވަނިކޮށް، ކޮރޯނާ ވައިރަހާއި ގުޅިގެން މުބާރާތް ފަސްކުރަން ފީފާއަށް މަޖުބޫރުވީއެވެ. އަދި މިހާރު އިއުލާންކޮށްފައިވާ ގޮތުން ދެން މުބާރާތް އޮންނާނީ އަންނަ އަހަރުގެ ފެބްރުއަރީ މަހުގެ ސަތާރައިން މާރިޗު މަހުގެ ހަތަކަށެވެ.
ސަތާރަ އަހަރުން ދަށުގެ އަންހެން ވޯލްޑްކަޕް ފަސްކުރަން ނިންމިއިރު، މިއަހަރުގެ އޮގަސްޓް / ސެޕްޓެމްބަރުގައި ޕެނަމާ އަދި ކޮސްޓަރިކާގައި ބޭއްވުމަށް ނިންމާފައިވާ ވިހި އަހަރުން ދަށުގެ އަންހެން ވޯލްޑްކަޕްވެސް ވަނީ ފަސްކޮށްފައެވެ. މި މުބާރާތް ދެން އަލުން ބާއްވާނެ ތާރީޚެއްގެ ގޮތުގައި ފީފާއިން ކަނޑައަޅާފައިވަނީ އަންނަ އަހަރުގެ ޖެނުއަރީ މަހުއެވެ.
