މި ފިލްމަށްޓަކައި އޭނާ ތައްޔާރުކުރި އާ ލުކް ފެނިގެންދިޔައީ އިނގިރޭސިވިލާތުގެ ލަންޑަނުގައި އާއިލާއާ އެކު ވަގުތު ހޭދަކުރަނިކޮށެވެ.
ލަންޑަނުގައި އާއިލާއާއި ރައްޓެހިންނާ އެކު ކްރިކެޓް ކުޅެން ހުރި އިރު، ޝާހްރުކް ހާން ހުރީ އޭނާގެ އާ ސޫރަ ވަންހަނާކުރުމަށްޓަކައި ތޮއްޕެއް އަޅައިގެންނެވެ. ނަމަވެސް އޭނާގެ އިސްތަށިގަނޑުން ގްރޭ ނުވަތަ އަޅި ކުލައެއް ފެންނަން ހުރުމުން، ސަޕޯޓަރުންގެ ސަމާލުކަން އެކަމަށް ހުއްޓުނެވެ.
ހަބަރުތައް ބުނާ ގޮތުގައި "ކިންގް" ފިލްމުގައި ޝާހްރުކް ހާން ފެނިގެންދާނީ ކުރިން އޭނާ ފެނިފައިނުވާ ފަދަ ތަފާތު ގޮތަކަށެވެ. އެގޮތުން މި ފިލްމުގައި އޭނާގެ އިސްތަށިގަނޑު ހުންނާނީ އަޅި ކުލައެއްގައެވެ. މި އާ ލުކް ސިއްރުކުރަން އޭނާ މަސައްކަތް ކުރި ނަމަވެސް، ލަންޑަނުން ނަގާފައިވާ ފޮޓޯތަކާއި ވިޑިއޯތަކުން އެކަން މިހާރު ވަނީ އާންމުވެފަ އެވެ.
ޝާހްރުކް ހާންގެ "ކިންގް" އަކީ އޭނާގެ ސަޕޯޓަރުން ވަރަށް ބޮޑަށް އިންތިޒާރުކުރަމުންދާ ފިލްމެކެވެ. މި ފިލްމުގެ އާ ލުކް ސޯޝަލް މީޑިއާގައި އާންމުވުމާ އެކު، އޭނާގެ ސަޕޯޓަރުން އަންނަނީ އެ ފިލްމާމެދު އޮތް ޝައުގުވެރިކަން ފާޅުކުރަމުންނެވެ.
