ވަރަށް ކުރު މުއްދަތެއްގެ ތެރޭގައި ކަޅޯ އާއި ނިމާލާ ދެމެދު ވަރަށް ގާތް ގުޅުމެއް އުފެދުނެވެ. ނިމާލު ކޮންމެ ތާކަށް ދިޔަޔަސް ކަޅޯ އޭނާގެ ފަހަތުން ދެއެވެ. ގޭތެރޭގައި އުޅޭއިރުވެސް ކަޅޯ އޮންނާނީ ނިމާލުގެ އުނގުމަތީގައެވެ. އެކަނިވެރިކަމުގެ ތެރޭގައި ހުރި ނިމާލަށް ކަޅޯ ވެގެން ދިޔައީ އޭނާގެ އެންމެ ގާތް އެކުވެރިޔާއަށެވެ.
ނަމަވެސް، ދުވަސްތައް ފާއިތުވަމުން ދިޔަ ވަރަކަށް ކަޅޯގެ ފަރާތުން އާދަޔާ ހިލާފު ކަންތައްތަކެއް ފެންނަން ފެށިއެވެ. އާންމުކޮށް ބުޅާ އުޅޭ ގޮތާ ހިލާފަށް ކަޅޯގެ އަމަލުތައް ހުންނަން ފެށިއެވެ. ބައެއް ފަހަރު ގޭގެ ދޮރުތައް އޭގެ ޒާތުގައި ހުޅުވިފައި ހުރެއެވެ. އަދި އަނެއްބައި ފަހަރު، ރޭގަނޑުގެ ހަމަހިމޭން ވަގުތުތަކުގައި ކަޅޯ މީހަކާ ވާހަކަދައްކާ ކަހަލަ އަޑުތަކެއް އިވެން ފެށިއެވެ.
ފުރަތަމަ ނިމާލު ހީކުރީ އެއީ އޭނާއަށް ހީވާ ގޮތެއް ކަމަށެވެ. އެކަމަކު އެއް ރެޔަކު ނިމާލަށް ހޭލެވުނުއިރު، ކަޅޯ އޭނާގެ އެނދު ކައިރީގައި އިށީނދެގެން، ނިމާލުގެ މޫނަށް ބަލަން އިން ގޮތުން އޭނާގެ ހިތުގައި ބިރުވެރިކަމެއް އުފެދުނެވެ. އެ ފެހި ކުލައިގެ ލޮލުގައި އޭރު ހުރީ ޖަނަވާރެއްގެ ކިބައިން ނުފެންނާނެ ފަދަ ތޫނުފިލިކަމެކެވެ. އިންސާނަކު ބަލާ ފަދަ ގޮތަކަށެވެ.
މިކަންތައްތައް އިތުރުވަމުން ދިޔަ ވަރަކަށް ނިމާލުގެ ނިދި ގެއްލެން ފެށިއެވެ. ގޭތެރޭގެ މާހައުލު ކުރިއަށްވުރެ ފިނިވެފައިވާ ކަމުގެ އިހުސާސް ކުރެވެން ފެށިއެވެ. ނިމާލުގެ އެކުވެރިން އޭނާއާ ބައްދަލުކުރަން އައުމުން، ކަޅޯ ފެނިފައި އެމީހުންވެސް ޖެހިލުންވެއެވެ. ބައެއް އެކުވެރިން ބުނި ގޮތުގައި އެ ބުޅަލުގެ ކިބައިގައި ނުބައި ސިފަތަކެއް އެބަހުއްޓެވެ.
އެއްރެޔަކު ނިމާލު ގޭގެ ސިޓިންގރޫމުގައި އިންދާ ކަރަންޓު ދިޔައެވެ. މުޅި ތަން އަނދިރިވެގެން ދިޔަ ވަގުތު، ކަޅޯގެ ލޯ އަނދިރީގެ ތެރެއިން ދިއްލިފައި ހުރި ތަން ނިމާލަށް ފެނުނެވެ. އެކަމަކު އެންމެ ބިރުވެރި ކަމަކަށްވީ، ފާރުގައި އެޅިފައިވާ ކަޅޯގެ ހިޔަންޏެވެ. އެ ހިޔަނި ބުޅަލެއްގެ ސިފައިގައެއް ނޫނެވެ. އެއީ ދިގު، ބޮޑު އިންސާނެއްގެ ސިފައެވެ.
ނިމާލުގެ ހިތް ބާރަށް ތެޅެން ފެށިއެވެ. އޭނާ ބިރުން ގޮސް ހަރަކާތްތެރިވާންވެސް ނުކެރުނެވެ. އޭނާ ގެންގުޅުނު ލޯބިވާ ބުޅަލަކީ އާދައިގެ އެއްޗެއް ނޫންކަން އޭނާއަށް ޔަގީންވިއެވެ. އެރޭ ނިމާލު ނިންމީ ކަޅޯއަށް ނޭނގި އޭނާގެ ހަރަކާތްތައް ބެލުމަށެވެ. އެގޮތުން ނިމާލު ނިދާކަމަށް ހަދައިގެން ލޯ މަރައިގެން އޮތެވެ.
މެންދަމުގެ ހަމަހިމޭން ވަގުތެވެ. ނިމާލަށް އިވުނީ ކަށިގަނޑެއް ބިނދޭ ކަހަލަ އަޑެކެވެ. މަޑުމަޑުން ލޯ ހުޅުވާލިއިރު، އެނދުގެ ކޮޅުގައި ހުރީ ބުޅަލެއް ނޫނެވެ. އެތަނުގައި ހުރީ އިސްކޮޅުން ދިގު، ކަޅު ކުލައިގެ ހިޔަންޏެކެވެ. އެ މަހުލޫގުގެ ލޮލުގައި ވަނީ ކަޅޯގެ ލޮލުގައި ހުންނަ ފަދަ ތޫނު ފެހި ކުލައެވެ. ނިމާލަށް ބޭއިހުތިޔާރުގައި ހަޅޭއްލަވައިގަނެވުނެވެ.
އެ މަހުލޫގު ނިމާލާ ދިމާއަށް ގުދުވެލިއެވެ. އަދި ބަރު، ފުން އަޑަކުން ވާހަކަދައްކަން ފެށިއެވެ. "ބިރުނުގަނޭ، ނިމާލު. އަހަރެން އައީ ނިމާލަށް ގެއްލުމެއް ދޭކަށް ނޫން،" އެއީ ކަޅޯގެ އަޑު ނޫން ނަމަވެސް، އެ މަހުލޫގުގެ ހަރަކާތްތަކުން އެއީ ކަޅޯކަން ނިމާލަށް ޔަގީންވިއެވެ. އެއީ ސިފަ ބަދަލުކޮށްގެން ހުރި ޖިންނިއެކެވެ. އެ ޖިންނި އިންސާނުންގެ ތެރޭގައި އުޅެން ބޭނުންވީއެވެ.
ޖިންނި ބުންޏެވެ. "އަހަރެން އުޅުނީ ވަރަށް އެކަނިވެރިކޮށް. ނިމާލުގެ އެކަނިވެރިކަން ފެނިފައި އަހަރެން ބޭނުންވީ އެކުވެރިއަކަށް ވާން. އެކަމަކު މިހާރު އަހަރެންގެ ހަގީގަތް އެނގިއްޖެ. ދެން އަހަރެންނަކަށް މިތާކު ނޫޅެވޭނެ،" ނިމާލު ބިރުން ހުރި ނަމަވެސް، އެ މަހުލޫގުގެ އަޑުގައިވާ މާޔޫސްކަން އޭނާއަށް އިހުސާސް ކުރެވުނެވެ.
އެ ބަސްތައް ބުނުމަށްފަހު، އެ ބޮޑު ހިޔަނި މަޑުމަޑުން ކުޑަވާން ފެށިއެވެ. ކުޑަ ހިނދުކޮޅެއްގެ ތެރޭގައި އެތަނުގައި އަނެއްކާވެސް ހުރީ ނިމާލު ލޯބިން ގެންގުޅުނު ކުޑަ ކަޅު ބުޅަލެވެ. ކަޅޯ އެންމެ ފަހު ފަހަރަށް ނިމާލަށް ބަލާލިއެވެ. އަދި ގޭގެ ދޮރުން ބޭރަށް ނުކުމެ، ރޭގަނޑުގެ އަނދިރިކަމުގެ ތެރެއަށް ގެއްލިއްޖެއެވެ.
އޭގެ ފަހުން ނިމާލަކަށް ކަލޯއެއް ނުފެނެއެވެ. ނިމާލު އަނެއްކާވެސް އެކަނިވެރިވީއެވެ. ނަމަވެސް މިހާރު އޭނާއަށް އެނގެއެވެ. ދުނިޔޭގައި އިންސާނުންނަށް ނުފެންނަ އެތައް ކަމެއް ވެއެވެ. އޭނާ ލޯބިން ގެންގުޅުނު އެންމެ ގާތް އެކުވެރިޔާއަކީ އާދައިގެ ޖަނަވާރެއް ނޫންކަން އެނގުމުން، ނިމާލުގެ ހަޔާތަށް ބޮޑު ބަދަލެއް އައެވެ. އޭނާ ދެން ދުވަހަކުވެސް ބުޅަލެއް ނުގެންގުޅެއެވެ.
