"ގާލްސް ޓު ކޯޑް" އަކީ ޓެކްނޮލޮޖީ ދާއިރާގައި އަންހެނުން ބާރުވެރިކުރުމަށް 2019 އިން ފެށިގެން ރާއްޖޭގެ އެކި ކަންކޮޅުތަކުގައި ކުރިއަށް ގެންދާ ހާއްސަ ޕްރޮގްރާމެކެވެ. މިހާތަނަށް 100 އަށް ވުރެ ގިނަ ޒުވާން އަންހެނުން މި ޕްރޮގްރާމް ކާމިޔާބުކަމާ އެކު ނިންމާފައިވާކަން ދިރާގުން ފާހަގަކުރެ އެވެ.

މި އަހަރުގެ އެޑިޝަން އޭދަފުށީގައި ކުރިއަށް ގެންދަނީ އޭއައި ހުނަރުތަކަށް ހާއްސަ އިސްކަމެއް ދީގެން ކަމަށް އެ ކުންފުނިން ބުންޏެވެ. އެހެންވެ، މުގައްރަރަށް ވެސް ބޮޑެތި ބަދަލުތަކެއް ވަނީ ގެނެސްފަ އެވެ.  

ހަތް ހަފުތާގެ މުއްދަތަށް "ހައިބްރިޑް" މޮޑެލްއަށް އޭދަފުށީގައި ކުރިއަށް ގެންދާ ޕްރޮގްރާމްގައި އަމަލީ ކުލާސްތަކާއި ވާޗުއަލް ސެލެކްޝަންތަކުގެ އިތުރުން މެންޓާޝިޕް ސެޝަންތައް ހިމެނެ އެވެ.

އޭދަފުށީގައި ޕްރޮގްރާމް ފެށުމުގެ ގޮތުން ބޭއްވި ރަސްމިއްޔާތުގައި ވާހަކަ ދައްކަވަމުން ދިރާގުގެ ސީނިއަ މެނޭޖަރު ކޯޕަރޭޓް ސޯޝަލް ރެސްޕޮންސިބިލިޓީ ބިޝާރާ ހަމީދު ވިދާޅުވީ ގާލްސް ޓު ކޯޑް ޕްރޮގްރާމްގެ މައިގަނޑު މަގްސަދަކީ ހަލުވިކަމާ އެކު ބަދަލުވަމުން އަންނަ ޓެކްނޮލޮޖީގެ ދުނިޔޭގައި ކުރިއަށްދިއުމަށް ބޭނުންވާ ހުނަރާއި އަމިއްލަ ނަފްސަށް އޮންނަ އިތުބާރުގެ އިތުރުން ޑިޖިޓަލް ދާއިރާގެ ހޭލުންތެރިކަން އިތުރުކޮށް އަންހެނުން ބާރުވެރިކުރުވުން ކަމަށެވެ.

އުމުރުން 15-35 އަހަރާ ދެމެދުގައި ކޯޑިންގެ ތަޖުރިބާ ނެތް އަންހެންކުދިންނަށް އަމާޒުކޮށްގެން ހިންގާ މި ޕްރޮގްރާމް ނިމޭއިރު، ބައިވެރިންނަށް އަމިއްލައަށް ވެބްސައިޓާއި ޑިޖިޓަލް ޕްރޮޖެކްޓްތައް ތައްޔާރުކުރަން ދަސްވާނެ ކަމަށް ދިރާގުން ބުނެ އެވެ. މީގެ އިތުރުން، ޓެކްނޮލޮޖީ ދާއިރާއިން ކުރިއަށް ދިއުމަށް ބޭނުންވާ ތައުލީމީ އަދި ވަޒީފާގެ ފުރުސަތުތަކާ ގުޅޭ މައުލޫމާތު ވެސް ބައިވެރިންނަށް ލިބޭނެ އެވެ.

އެ ޕްރޮގްރާމް މިހާތަނަށް މާލެ، ހއ. ދިއްދޫ، ހދ. ކުޅުދުއްފުށި، ލ. އަތޮޅު، ގދ. ތިނަދޫ އަދި ފުވައްމުލަކުގައި ވަނީ ބާއްވައިފަ އެވެ.