އެކަމަށް ހާއްސަކޮށް ބޭއްވި ރަސްމިއްޔާތުގައި ސްޓެލްކޯގެ މެނޭޖިން ޑިރެކްޓަރު ޑރ. އަލީ އަޒުވަރު އާއި މޯލްޑިވްސް ޕޮލިޓެކްނިކްގެ ސީއީއޯ ޒޫޝާން ކަމާލުއްދީންގެ އިތުރުން ސްޓެލްކޯ އާއި މޯލްޑިވްސް ޕޮލިޓެކްނިކް އިސްވެރިން ބައިވެރިވެވަޑައިގެންނެވި އެވެ.
ކޯސް ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުން، އަޒުވަރު ވިދާޅުވީ ކުންފުނީގައި މަސައްކަތްކުރާ ގިނަ މުވައްޒަފުންނަކީ ތަމްރީނު ހާސިލުކޮސްފައި ތިބި މުވައްޒަފުންތަކަކަށް ވެގެން ދިއުމަށް ކުންފުނިން އުންމީދު ކުރާކަމަށެވެ.
މުވައްޒަފުންގެ ހުނަރާއި ކެޕޭސިޓީ ބިލްޑް ކުރުމަށް ކުރެވޭ މި އިންވެސްޓްއަކީ ހަމައެކަނި ސެޓްފިކެޓެއް ނޫން ކަމަށް އަޒުވަރު ވިދާޅުވި އެވެ. އަދި އަޒުވަރު ވަނީ ކޯހުގެ ބައިވެރިން ޝައުގުވެރިކަމާއެއްކޮށް ސެޝަންތަކުގައި ބައިވެރިވެ، ސުވާލުތައް ކޮށް، އަމަލީ ޕްރެކްޓިކަލްސްތަކުގައި ބައިވެރިވެ، ތަމްރީނުތަކާއި ގުޅޭގޮތުން މަޝްވަރާކޮށް، ދަސްކުރުމުގައި ހަރަކާތްތެރިވުމަށް އެދިފަ އެވެ.
ސްޓެލްކޯގެ އެކި ދާއިރާތަކުގައި މަސައްކަތްކުރާ މުވައްޒަފުންނަށް ސެޓްފިކެޓް ލެވެލް ހާސިލްކުރުމަށް ހުޅުވާލި ފުރުސަތުގައި ކުންފުނީގެ އެކި ޑިޕާޓްމަންޓްތަކުންނާއި، އަތޮޅުތެރޭގެ އިންޖީނުގެތަކުން ޖުމްލަ 76 މުވައްޒަފުން ވަނީ ކޯސްތަކަށް ކުރިމަތިލައި، މޯލްޑިވްސް ޕޮލިޓެކްނިކްގެ އޯގަސްޓް 2026 އިންޓޭކްގައި ބައިވެރިވެފަ އެވެ.
