އިންޑިއާގައި ގޫގުލް އިން ދާދި ފަހުން ފެށި މި ކެމްޕޭންގެ މައިގަނޑު އަމާޒަކީ، އާންމު ރައްޔިތުންނާ ގާތުން، އެ މީހުންނަށް ފަސޭހައިން ދޭހަވާނެ ބަހުރުވައަކުން އޭއައި ގެ ބޭނުންތެރިކަން ކިޔައިދިނުމެވެ. ހާއްސަކޮށް، ޓެކްނޮލޮޖީއަށް ފަރިތަ ނޫން މީހުންގެ ހިތްތަކުގައި އޮންނަ ބިރުވެރިކަން ފިލުވާލައި، އަމިއްލަ މާދަރީ ބަހުން ވާހަކަދައްކައިގެން ކަންކަން ހައްލުކުރެވޭނެކަން އަންގައިދިނުމަކީ މި ކެމްޕޭންގެ އެންމެ ބޮޑު ބޭނުމެވެ.
މެކޭން އިންޑިއާ އާއި ނިރްވާނާ ފިލްމްސް ގުޅިގެން ތައްޔާރުކޮށްފައިވާ މި އިޝްތިހާރުތަކުން ފެނިގެންދަނީ ވަރަށް އާދައިގެ ދިރިއުޅުމެއް އުޅެމުންދާ މީހުންގެ ވާހަކަތަކެވެ. މިސާލަކަށް، ފައިވާން ވިއްކާ މީހަކު އޭނާގެ ވިޔަފާރި ކުރިއަރުވަން ގޫގުލް ޖެމިނައި މެދުވެރިކޮށް އާ ހިޔާލުތައް ހޯދާ މަންޒަރާއި، ގޭގައި ނެށުން ދަސްކޮށްދޭ ޓީޗަރަކު އޭނާގެ މަސައްކަތް ފުޅާކުރާނެ ގޮތް ހޯދާ މަންޒަރު ހިމެނެއެވެ.
ޝާހްރުކް ހާންގެ އަސަރުގަދަ އަދި ހިތްވަރުދޭ ބަސްތަކާއެކު، އޭއައި ސިފަކޮށްދީފައިވަނީ ހަމައެކަނި މެޝިނެއްގެ ގޮތުގައެއް ނޫނެވެ. އޭގެ ބަދަލުގައި، އެއީ އަމިއްލަ ވިޔަފާރިތައް ޕްރޮމޯޓުކޮށް ސޯޝަލް މީޑިއާގައި ކުރިއަރައި ދިއުމަށް މަގުދައްކައިދޭ އެންމެ ގާތް އެހީތެރިޔާގެ ގޮތުގައެވެ.
މި ކެމްޕޭނަކީ މަޝްހޫރު ކްރިއޭޓިވް ޑިރެކްޓަރު ޕްރަސޫން ޖޯޝީގެ ހިޔާލެކެވެ. ގޫގުލް އިން ވަނީ މި ކެމްޕޭން އިންޑިއާގެ އެކި ކަންކޮޅުތަކަށް ފޯރުކޮށްދިނުމަށްޓަކައި ބޮޑެތި މަސައްކަތްތަކެއް ކޮށްފައެވެ. މުމްބާއީގެ މަގުތަކުގައި ބޮޑެތި ބިލްބޯޑުތައް ހަރުކުރުމުގެ އިތުރުން، ނޫސްމަޖައްލާތަކުގައި ވެސް ޝާހްރުކް ހާންގެ މަޝްހޫރު ސްޓައިލްތައް ބޭނުންކޮށްގެން އާންމުންގެ ސަމާލުކަން ހޯދާފައިވެއެވެ.
