ރައީސް މުއިއްޒު މިހެން ވިދާޅުވީ މިއަދު ފާހަގަކުރަމުންދާ ދިވެހިރާއްޖޭގެ އިންޖިނޭރުންގެ ދުވަހުގެ މުނާސަބަތުގައި އެކްސްގައި ދެއްވި މެސެޖެއްގައެވެ.
އިންޖިނިއަރިން ދާއިރާގައި މަސައްކަތްކުރާ ފަރާތްތަޔތަކީ ވަރަށް ބުރަކޮށް މަސައްކަތް ކުރައްވާ ބައެއްކަން ފާހަގަކުރައްވަމުން ރައީސް މުއިއްޒު ވިދާޅުވީ އިންޖިނިއަރިން ދާއިރާއަށް އިތުރު ދިވެހިން ނެރެންޖެހޭކަމަށެ ވެ. އެގޮތުން އިންޖިނިއަރިން ދާއިރާއިން މަތީ ތައުލީމު ޙާސިލުކުރާ ކުދިންގެ އަދަދު އިތުރުކުރަން ޖެހޭކަން ފާހަގަކުރައްވަމުން ރައީސް ވިދާޅުވީ އެ ދައިރާއިން ކިޔަވަން ބޭނުންވާ ކުދިންނަށް ސަރުކާރުން އެހީތެރިކަން ފޯރުކޮށްދޭނެކަމަށެ ވެ.
އެގޮތުން ރާއްޖޭގައި އިންޖިނިއަރިންގެ އެކި ދާއިރާތަކުން ތަހުލީލާއި ދިރާސާތައް ކުރެވޭނެ ފެންވަރުގެ ލެބޯޓަރީއެއް ގާއިމުކުރުމަށް ނިންމަވާފައިވާކަމަށް ރައިސް މުއިއްޒު ވިދާޅުވި އެވެ. އަދި މި ލެބޯޓްރީން ދިވެހި ދަރިވަރުންނަށާއި، ރާއްޖޭން ބޭރުގެ ފަރާތްތަކަށްވެސް އިންޖިނިއަރިން ދާއިރާއާ ގުޅުންހުރި އެކި ކަހަލަ ދިރާސާތަކާއި ތަހުލީލުތައް ކުރެވޭނެކަމަށްވެސް ރައީސް މުއިއްޒު ވިދާޅުވި އެވެ.
ކޮންމެ އަހަރެއްގެ އޮގަސްޓު މަހުގެ 30ވަނަ ދުވަހަކީ، ގައުމީ ފެންވަރުގައި ފާހަގަކުރާ، "ދިވެހިރާއްޖޭގެ އިންޖިނޭރުންގެ ދުވަސް” ކަމުގައި ރައީސް ޑރ މުހައްމަދު މުއިއްޒު، ހަމަޖައްސެވީ މިދިޔަ އަހަރު އެވެ. އެދުވަސް ފާހަގަކުރަނީ މި ގައުމުގެ ތާރީހުގައި މިހާތަނަށް ހިންގުނު އެންމެ ބިޔަ އުމްރާނީ ތަރައްގީގެ މަޝްރޫއު ކަމުގައިވާ، ސިނަމާލެ ބުރިޖު އިފުތިތާހުކުރެވުނު ދުވަހާ ގުޅުވައިގެން ނެވެ.
