އިސް ގާޒީ އާދަމް މުހައްމަދު ކުރެއްވި މި ހުކުމުގައި، އެހެން މީހެއްގެ މުދަލެއްގެ މައްޗަށް ހުއްދަނޫން ގޮތުގައި ބާރު ހިންގުމުގެ ކުށް ހާފިޒްގެ މައްޗަށް ސާބިތުވާ ކަމަށް ކަނޑައަޅައި، ޖަލު ހުކުމުގެ އިތުރުން ގެއްލުންވި ފަރާތަށް 10,000 ރުފިޔާ ދެ އަހަރު ތެރޭގައި ސިވިލް ކޯޓަށް ދެއްކުމަށް ވަނީ އަމުރުކޮށްފަ އެވެ.
ހާފިޒް ޝަރީއަތުގައި ތަފާތު ދިފާޢުތަކެއް ނެގި ނަމަވެސް، ބޭންކް ސްޓޭޓްމަންޓްތަކުން އެ ފައިސާ އޭނާގެ އެކައުންޓަށް ޖަމާވުމާއެކު އެހެން އެކައުންޓަކަށް ޓްރާންސްފަރ ކޮށްފައިވާކަން އެނގެން އޮތުމުން، ކޯޓުން ވަނީ އޭނާ ދެއްކި ވާހަކަތަކަކީ ޝަރީޢަތަށް އޮޅުވާލަން ދެއްކި ވާހަކަތަކެއްކަން ކަނޑައަޅައިފަ އެވެ.
