Advertisement

ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲ އަށް ކުޑޫ ފޮނުވި ސީޓިއެއްގައި ވިދާޅުވީ މާލޭ ސަރަހައްދުގައި ހިނގާ މަގުމަތީގެ ނުރައްކާތެރި ހާދިސާތައް އިންތިހާއަށް އިތުރުވެ އެކަމުގެ ސަބަބުން އެތައް ރައްޔިތުންނެއްގެ (ހާއްސަކޮށް ޒުވާނުންގެ) ފުރާނެ ގެއްލި އަދި އުމުރުދުވަހުގެ ނުކުޅެދުންތެރިކަމާއި ކުރިމަތިލާން ޖެހުމަކީ ދިވެހި ރައްޔިތުން ނުހަނު ކަންބޮޑުވާ އާއްމު ސަލާމަތާއި ރާއްކާތެރިކަމާއި ގުޅިފައިވާ ވަރަށް ނާޒުކު މައްސަލައެއް ކަމަށެވެ. 

އެކަމަށް ހައްލެއް ހޯދުމުގެ ގޮތުން 4 އޮގަސްޓް 2025ގައި ރައްޔިތުން މަޖިލީހުގެ ސަލާމަތީ ހިދުމަތްތަކާއި ބެހޭ ކޮމެޓީ (241 ކޮމެޓީ ) އަށާއި ޖުޑިޝަރީ ކޮމެޓީ  ގުޅިގެން ހާއްސަ އަޑުއެހުމެއް ބާއްވާ ދިނުމަށް ހުށައަޅާފައިވީނަމަވެސް މިހާތަނަށް މި ނުރައްކާތެރި ހާލަތަށް އެކަށީގެންވާ ހައްލެއް ލިބިފައި ނުވާކަމަަށް ކުޑޫ ވިދާޅުވި އެވެ.

ގާނޫނުލް އުގޫބާތުގައި، ފަރުވާ ކުޑަ އަމަލެއްގެ ސަބަބުން މީހަކު މަރުވުމުން އުފުލަންޖެހޭ ޖިނާއީ މަސްއޫލިއްޔަތުތައް ބަޔާންކޮށްފައި އޮންނަކަމަށާއި އެއްގަމުން ދަތުރުފަތުގެ ގާނޫނީ އޮނިގަނޑުގައިވެސް ނުރައްކާތެރިކޮށް ދުއްވުމާއި ގުޅިގެން އެޅޭނެ ފިޔަވަޅުތަކާއި ލައިސަންސް ހިފެހެއްޓުމާއި ގުޅޭ އުސޫލަތައްވެސް ކަނޑައަޅާފައިވާކަން ކުޑޫގެ ސިޓީގައި ވަނީ ފާހަގަކޮށްފަ އެވެ. އެހެންނަމަވެސް ގާނޫނުގައި މިފަދައިން ބަޔާންކޮށްފައި އޮތް ނަމަވެސް ހާދިސާތަކުގެ ތަހުގީގުތައް ދިގުލައިގެން ދިޔުމާއި ދައުވާ އުފުލުން ލަސްވުމާއި ޝަރުއީ މަރުހަލާގައި ގަޒިއްޔާތައް ނުނިމު ގިނަ ދުވަސް ވުމަކީ އަދުލު އިންސާފުގެ ނިޒާމާމެދު އާއްމު ރައްޔިތުންގެ އިތުބާރު ކުޑަވަގެންދާކަމެއްކަމަށް ކުޑޫ ވިދާޅުވި އެވެ. 

މިކަމުގެ ހިތާމަވެރި އެއް މިސާލަކީ 29 މޭ 2018 ވަނަ ދުވަހު ހުޅުމާލޭގއި ހިނގި ނުރައްކާތެރި އެކްސިޑެންޓެއްގައި ސަބަބުން އުމުރު ދުވަހަށް ނުކުޅެންދުންތެރިކަން ތަހައްމަލު ކުރަންޖެހިފައިވާ އުމަރު ސަލީމްގެ މައްސަލަ. އެ މައްސަލައިގެ ޝަރުއީ މަރުހަލާ އިންތިހާއަށް ދިގުލައިގެން ގޮސްފައިވުން ހާއްސަ ގޮތެއްގއި ފާހަގަކުރާ ކަމަކެވެ. 

އެހެންވެ އެފަދަ މައްސަލަތަކުގެ މިހާރުގެ ހާލަތު ދައުލަތުގެ ކަމާއި ބެހޭ އިދާރާތައް މެދުވެރިކޮށް ކޮމެޓީން ސާފުކުރުން ނުހަނު މުހިއްމުކަމަށް ކުޑޫ ވިދާޅުވި އެވެ. އެހެންކަމުން މާލެ ސަރަހައްދުގައި ހިނގާ ނުރައްކާތެރި މަގުމަތީ ހަދިސާތަކާއި ގުޅޭގޮތުން އިޖުތިމާއި ކޮމެޓީގެ އާއްމު އަޑުއެހުމެއް ބޭއްވުމަސް އެދި އިތުރު ހަތް ކަމެއް ކުރުމަށް ކުޑޫ ވަނީ މަޖިލިހަށް ހުށައަޅުއްވާފަ އެވެ.

ކުޑޫ ހުށައެޅުއްވި ކަންކަން 

• ދިވެހި ފުލުހުންގެ ހިދުމަތާއި، ޕްރޮސިކިއުޓާ ޖެނެރަލްގެ އޮފީހާއި، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޭޝަން އަދި ގުޅުންހުރި އެހެނިހެން މުއައްސަސާތައް ރައްޔިތުންގެ މަޖިލީހުގެ ކަމާއި ބެހޭ ކޮމެޓީތަކަށް ހާޒިރުކޮށްދެއްވައި، މ ފަދަ މައްސަލަތަކާގުޅޭ މައުލޫމާތާއި ތަފާސްހިސާބުތައް ސާފުކުރުން.
• އެއްގަމު ދަތުރުފަތުރުގެ ޤާނޫނާއި ޤާނޫނުލްއޫޤޫބާތަށް އިސްލާހު ގެނެސް، ނުރައްކާތެރިކޮށް ދުއްވައިގެން މީހުންނަށް އަނިޔާވުމާއި މަރުވާ ހާދިސާތަކުގައި ކަނޑައަޅާފައިވާ ޖަލު އަދަބުތަކާއި ޖޫރިމަނާތައް މިހާރަށްވުރެ ބޮޑުކުރުމާއި، ލައިސަންސް ބާތިލުކުރުމާއި ގާނޫނާ ހިލާފަށް ދުއްވި އުޅަނދު ދައުލަތަށް ނެގޭނޭ ހާލަތުތަކާއި އިޖުރާއަތު ސާފުކޮށް ބަޔާންކުރުމާއި، ތަކުރާރުކޮށް ނުރައްކާތެރިކޮށް ދުއްވާ ފަރާތްތަކުގެ ލައިސަންސް ދާއިމީކޮށް ހިފެހެއްޓޭނެ ނުވަތަ ބާތިލުކުރެވޭނޭ އަދި އެފަދަ އުޅަނދުތައް ދައުލަތަށް ނެގޭނެ ވަރުގަދަ މާއްދާތަކެއް ޤާނޫނުގައި ހިމެނުމަށް މަސައްކަތް ކޮށްދިނުން
• އެކްސިޑެންޓްތަކުގައި އަނިޔާވާ މީހުންގެ ބޭސްފަރުވާއަށާއި، ލިބޭ ދާއިމީ ނުކުޅެދުންތެރިކަމަށް އެކަށީގެންވާ ބަދަލެއް ލިބޭނެ ފަދަ ޝާމިލު (ކޮމްޕްރެހެންސިވް / ތާޑް ޕާޓީ ) އިންޝުއަރެންސް ނިޒާމެއް ތަޢާރަފުކޮށް، އެއީ އުޅަނދު ދުއްވުމަށް ލާޒިމު ޝަރުތެއްގެ ގޮތުގައި ޤާނޫނަކުން ކަނޑައެޅުމަށް ކުރެވޭނީ ކޮންކަންތައްތަކެއްތޯ ބެލުން
• ބޮޑެތި އެކްސިޑެންޓުތަކުގެ ތަހުގީގުތަކާއި، ދައުވާކުރުމާއި، އަދި ޝަރީއަތްތައް ނިންމުމަށް ދިގު މުއްދަތެއް ނަގާ ސަބަބުތައް ދެނެގަނެ، ނިޒާމީ ގޮތުން ހުރި އުނިކަންކަން ހޯދައި ބެލުން
• ފުރާނަ ގެއްލޭ ނުވަތަ ބޮޑެތި އަނިޔާތައް ލިބޭ ހާދިސާތަކުގެ ތަހުގީގުތަކާއި ޝަރީއަތްތައް ހިންގުމަށް ވަކި ހާއްސަ މުއްދަތުތަކެއް (ޓައިމްލައިނެއް) ކަނޑައެޅުމާއި، މައްސަލައިގެ ކުރިއެރުންތައް އަނިޔާ ލިބޭ ފަރާތްތަކަށާއި އާއިލާތަކަށް ގަވާއިދުން އަންގައިދެވޭނެ ނިޒާމެއް ޤާއިމުކުރުމަށް ބާރުއެޅުން
• ބާރު ސްޕީޑުގައި ދުއްވުމާއި، ރޭސްކުރުމާއި، ނުރައްކާތެރިކޮށް ދުއްވުން ހުއްޓުވުމުގެ ގޮތުން މާލެއާއި ހުޅުމާލޭގައި ސްޕީޑް މޮނިޓަރިން އަދި ކެމެރާ އެންފޯސްމަންޓް ޤާއިމުކޮށް، މަގުމަތީގެ ސަލާމަތްތެރިކަމާއި ލައިސަންސާާ ގުޅޭ ފިޔަވަޅުތައް މިހާރަށްވުރެ ހަރުދަނާކޮށް ތަންފީޒުކުރުމަށް ކަމާބެހޭ އިދާރާތަކަށް އެންގުން
• މަގުމަތި މޮނިޓާ ކުރާނެ، ސްޕީޑް ކެމެރާތަކާއި، އޮޓޮމެޓިކް - ޕައިން، ސިސްޓަމްތައްފަދަ ޒަމާނީ، ވަސީލަތްތައް ޤާއިމުކުރުމަށް ބޭނުންވާ ފައިސާ ދައުލަތުގެ ބަޖެޓުން ކަމާބެހޭ އިދާރާތަކަށް ހަމަޖައްސައިދިނުމަށް ބާރުއެޅުން
  ކުޑޫ ވިދާޅުވީ މިކަންކަން ކުރުމުގެ އަސްލު މަގުސަދަކީ މަގުމަތީގެ ނުރައްކާތެރި ހާދިސާތަކުން ދިވެހި ރައްޔިތުންގެ ފުރާނައާއި މުދާ ރައްކާތެރިކުރުމާއި، ހާދިސާއެއް ހިނގާ ހާލަތުގައި ޖިނާއި އަދުލުގެ ނިޒާމު އެންމެ ހަރުދަނާ އަދި އަވަސް މިނެއްގައި ހިނގާކަން ކަށަވަރުކުރުންކަމަށެވެ.