ކަސްޓަމްސް އިން ބުނީ ސެޕްޓެމްބަރު 7 ވަނަ ދުވަހު ކޫރިއާ މެދުވެރިކޮށް ރާއްޖެއަށް އެތެރެކުރަން އުޅުނު 11 ކިލޯއަށް ވުރެ ގިނަ ޑްރަގްސް އަތުލައިގެންފައިވަނީ ވެލާނާ އިންޓަނޭޝަލް އެއާޕޯޓުގައި ކަމަށެވެ. އެއީ 11.7 ކިލޯގެ ކެނަބިސް ކަމަށް ކަސްޓަމްސް އިން ބުންޏެވެ. 

ކަސްޓަމްސް އިން ބުނި ގޮތުގައި އެތަކެތި އަތުލައިގެންފައި ވަނީ ކޫރިއާ މެދުވެރިކޮށް ރާއްޖެއަށް ގެނެސްފައިވާ ދެ ޕެކޭޖެއް ބަލައިފާސްކުރަމުން ދިޔައިރު، އޭގެ ތެރޭގައި ޑްރަގްސް ފޮރުވާފައި ހުރި ކަމަށް ކަސްޓަމްސްއަށް ޝައްކުކުރެވިގެން އިތުރަށް ބަލައިފާސްކުރުމުގެ ތެރެއިންނެވެ. 

ނަމަވެސް އެ މައްސަލައާ ގުޅިގެން މިހާތަނަށް މީހަކު ހައްޔަރުކުރި ކަމެއް އަދި ސާފެއް ނޫނެވެ. 

ފާހަގަކުރެވޭ ގޮތުގައި، މަސްތުވާތަކެތީގެ މައްސަލަތައް ރާއްޖޭގައި އިތުރުއިރު، ހަށިގަނޑުގައި ފޮރުވައިގެންނާއި ޕެކޭޖު މެދުވެރިކޮށް އެތެރެކުރާ ޑްރަގްސް ދޭތެރެދޭތެރެއިން އަތުލައިގަނެ އެވެ. އެ ފަދަ މައްސަލަތަކުގައި ބިދޭސީން ވެސް ހައްޔަރުކުރާއިރު، މި މައްސަލަ ހައްލުކުރުމަށް ސަރުކާރުން އަންނަނީ މަސައްކަތްތައް ކުރަމުންނެވެ.