ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އާރްޑީސީއާ ހަވާލުކޮށްގެން އަމީނީމަގު ޒަމާނީ ފެންވަރަށް ހެދުމުގެ މަސައްކަތް ފެށީ ޖުލައި 2022 ގަ އެވެ. އަދި ފިޔަވަހިތަކަކަށް ބަހާލައިގެން ކުރިއަށް ގެންދިޔަ އެ މަޝްރޫއުގައި އެ ވެރިކަން ނިމުނުއިރު ފުރިހަމަނުވެ އޮތް ސަރަހައްދުގެ އެންމެ ފަހު ބައި ހަދައި ހުޅުވީ 2024 ވަނަ އަހަރު އެވެ.
ސޯލިހުގެ ސަރުކާރުން ކުރިއަށް ގެންދިޔަ އަމީނީ މަގުގައި ތާރުއަޅައި ހެދުމުގެ މަސައްކަތް ނިންމައި ބޭނުން ކުރަން ފެށިތާ މާގިނަ އަހަރުތަކެއް ނުވެ، އެމަގުގައި ބޮޑެތި އަޑިގުޑަންތައް ހެދި، ދުއްވާ މީހުންނަށް ބޮޑު ތަކުލީފުތަކެއް ކުރިމަތިވާތީ ސަރުކާރުން އެ މަގު ފިޔަވަހިތަކަށް ބަހާލައިގެން ހަދަން ފަށާފައިވަނީ މިދިޔަ އޮގަސްޓް މަހުގެ 3 ވަނަ ދުވަހު އެވެ.
އަމީނީ މަގުގެ ހަލާކުވެފައި އޮތް ސަރަހައްދު އަވަހަށް ހަލާކުވެފައިވަނީ ތާރު އެޅުމަށްފަހު، ތާރުގަނޑު ރަނގަޅަށް ނުހިކެނީސް އުޅަނދުތަކަށް މަގު ހުޅުވާލުމުންކަމަށް ކަމުގެ ފަންނީ ބޭފުޅުން ފާހަގަކުރައްވަ އެވެ.
ސެގްމެންޓްތަކަށް ބަހާލައިގެން މަގު ހެދުމުގެ މަސައްކަތް އެމްޓީސީސީން ކުރިއަށް ގެންދިޔައިރު، ސެގްމެންޓް 1 ކަމަށްވާ އިއްޒުއްދީން މަގު (ދިވެހިރާއްޖޭގެ އަޑު ކުރިމަތި) އިން ފެށިގެން ދަރުމަވަންތަ ހޮސްޕިޓަލުގެ ޕާކާ ހަމައަށް އޮތް ސަރަހައްދުގައި ތާރު އަޅައި ނިންމާލާފައިވަނީ މިމަހުގެ 22 ވަނަ ދުވަހު އެވެ.
އެ މަސައްކަތަށް ފަހު އެމްޓީސީސީން ވަނީ ދެވަނަ ސެގްމަންޓުގެ ގޮތުގައި ތަރައްގީކުރުމަށް ހަމަޖެހިފައިވާ އިއްޒުއްދީން މަގުން ފެށިގެން ގިޔާސުއްދީން އިންޓަނޭޝަނަލް ސްކޫލާ ހަމައަށް އޮންނަ ސަރަހައްދުގެ މަސައްކަތް ވެސް ފެށިކަން އިއުލާނުކޮށްފަ އެވެ.
