މިދިޔަ ޖޫން މަހު ކްރިމިނަލް ކޯޓުން ތިން މައްސަލައެއްގައި ޝައްމާން ޖަލަށްލާން ހުކުމް ކުރީ، އިމިގްރޭޝަންގެ ބައެއް މުވައްޒަފުންނާ ގުޅިގެން ގަވާއިދާ ހިލާފަށް ހިންގި އޮޕަރޭޝަނެއްގައި ބިދޭސީ މަސައްކަތްތެރިންތަކެއް ހައްޔަރުކޮށް، އޭގެ ތެރެއިން އެކަކު އަތުން 530,000 ރުފިޔާ ނެގި ކަމަށް ސާބިތުވުމުންނެވެ. މި މައްސަލައިގައި އޭނާގެ މައްޗަށް ސާބިތުވެފައިވަނީ ފޭރުމުގައި ބައިވެރިވުމާއި، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ އިތުރުން މަނީ ލޯންޑްރިންގެ ކުށުގެ ދައުވާއެވެ.
ޝައްމާންގެ މައްޗަށް ކުރި ހުކުމްތައް ހައިކޯޓުގައި އިސްތިއުނާފުކުރި ނަމަވެސް، އެ މައްސަލަތައް ހައިކޯޓަށް ބަލައިގަތުމާ މެދު އަދި ގޮތެއް ނިންމާފައެއް ނުވެއެވެ.
މި މައްސަލައާ ގުޅިގެން ޝައްމާންގެ އާއިލާއިން ކުރިން ބުނެފައިވަނީ، އޭނާ ހައްޔަރުކުރީ ހޯމް މިނިސްޓަރު އަލީ އިހުސާންގެ ކޮރަޕްޝަން މައްސަލަތަކެއް އާންމުންނަށް ހާމަކޮށްފާނެތީ، އެކަމަށް ފަސްއެޅުމުގެ ގޮތުން ކަމަށެވެ. އަދި އޭނާގެ އަތުގައި އިހުސާންގެ "ވީޑިއޯ"އެއް އޮތްކަން އެނގުމުން އޭނާ ބަންދުކުރަން އިހުސާން މަސައްކަތް ކުރެއްވި ކަމަށްވެސް އާއިލާއިން ވަނީ ތުހުމަތުކޮށްފައެވެ.
ޝައްމާންގެ މައްޗަށް އިއްވި ހުކުމާ ގުޅިގެން ސިޔާސީ އިސް ފަރާތްތަކުންވެސް ވަނީ ކަންބޮޑުވުން ފާޅުކޮށްފައެވެ. ކުރީގެ ރައީސް އަބްދުއްﷲ ޔާމީން އަބްދުލްގައްޔޫމް މިއީ ކުށާ ނުބައްދަލު، ސިޔާސީ ހުކުމެއް ކަމަށް ތުހުމަތު ކުރެއްވިއިރު، ކުރީގެ އިކޮނިމިކް މިނިސްޓަރު ފައްޔާޒް އިސްމާއީލް ވިދާޅުވީ މިއީ ސަރުކާރުގެ އަސްލު ހަގީގަތް ޝައްމާން ކިޔައިދެއްވުމުން ބަދަލުހިފުމުގެ ގޮތުން ކުރި ހުކުމެއް ކަމަށެވެ.
