ޔުނިވަސިޓީ އޮފް އީސްޓް އެންގްލިއާގެ ސައިންސްވެރިން ހޯދި މި ހޯދުން ޝާއިއުކޮށްފައިވަނީ "ޖާނަލް އޮފް ޓްރާންސްލޭޝަނަލް މެޑިސިން" ގައެވެ. މި ދިރާސާގައި ވަނީ ދިގުމުއްދަތަކަށް ވަރުބަލިކަން އިހުސާސްވާ ތަފާތު ސަބަބުތައް އެއް ތިއަރީއަކުން ގުޅުވާލަދީފަ އެވެ.
މި ދިރާސާއިން ދައްކާ ގޮތުގައި، ތަފާތު ފަސް ސިއްހީ ހާލަތެއް ކަމަށްވާ "ލޯންގް ކޮވިޑް"، "އެމްއީ/ސީއެފްއެސް"، "ޕީޓީއެސްޑީ"، "މަލްޓިޕްލް ސްކްލެރޯސިސް" އަދި "ރޫމަޓޮއިޑް އާތުރައިޓިސް" އަކީ އެކި ކަންކަމާ ގުޅިގެން މެދުވެރިވާ ހާލަތްތަކެއް ކަމަށްވީ ނަމަވެސް، މި ހުރިހާ ބަލިތަކެއްގައިވެސް ހަށިގަނޑަށް އަސަރުކުރަނީ އެއް ނިޒާމުތަކަކަށެވެ.
ސައިންސްވެރިން ހާމަކުރި ގޮތުގައި، މި ފަސް ހާލަތުގައިވެސް ހަށިގަނޑުގެ ސެލްތަކުގެ ހަކަތަ އުފައްދައިދޭ ނިޒާމާއި، ދިފާއީ ނިޒާމުގެ ނެޓްވޯކްތަކަށް ކުރާ އަސަރުތައް މުޅިން އެއްގޮތެވެ. މި ނިޒާމުތަކަށް ބުރޫއެރުމުގެ ސަބަބުން ހަށިގަނޑުގައި ހަކަތަ އުފެއްދުމަށް ހުރަސްއެޅި، މީހާ އަބަދު ވަރުބަލިވެފައި ހުރުމަށް މެދުވެރިވެ އެވެ.
މި ހޯދުމުގެ ސަބަބުން، ތަފާތު އެކި ބަލިތަކާ ގުޅިގެން މެދުވެރިވާ ދިގުމުއްދަތުގެ ވަރުބަލިކަމަށް އެކަށީގެންވާ ފަރުވާއެއް ހޯދުމަށް ސައިންސްވެރިންނަށް އިތުރު މަގުތަކެއް އަލިވެގެންދާނެއެވެ. އަދި ސެލްތަކުގެ ހަކަތައާއި ދިފާއީ ނިޒާމަށް އަންނަ ބަދަލުތައް ދެނެގަނެވިފައިވުމަކީ، މި ހާލަތްތަކަށް ފަރުވާ ހޯދުމަށް ލިބުނު ބޮޑު ކުރިއެރުމެކެވެ.
