ހުޅުމާލޭގައި ދިރިއުޅޭ އިސްރަށްވެހިންގެ ދުޅަހެޔޮކަން އިތުރުކޮށް، އިޖުތިމާއީ ގުޅުންތައް ބަދަހިކުރުމަށް، "ދުޅަހެޔޮ އިސްރަށްވެހިން"ގެ ނަމުގައި މި ހާއްސަ ޕްރޮގްރާމް ފެށީ އެޗްޑީސީއާއި ހެލްތު މިނިސްޓްރީ ގުޅިގެންނެވެ.
މިއަހަރުގެ އިސްރަށްވެހިންގެ ދުވަސް ފާހަގަކުރުމަށް މިއަދު ހެނދުނު ހުޅުމާލޭ ސެންޓްރަލް ޕާކުގައި ކުރިއަށްގެންދިޔަ ހަރަކާތުގެ ތެރެއިން، މި ޕްރޮގުރާމު އިފްތިތާހުކޮށްދެއްވީ، މިނިސްޓަރ އޮފް ހެލްތު، ވެލްފެއާ އެންޑް ފެމިލީ، ގީލާ އަލީއެވެ.
މި ޕްރޮގްރާމަކީ ގިނަ އިސްރަށްވެހިން އަބަދު ގޭގައި ތިބެންޖެހޭ ޖެހުމާއި، އިޖުތިމާއީ ހަރަކާތްތަކުން އެކަހެރިވުން ނައްތާލައި، އެފަރާތްތަކަށް އުފާވެރި އަދި ހަރަކާތްތެރި މާހައުލެއް ގާއިމުކޮށްދިނުމުގެ މަގްސަދުގައި ރާވާފައިވާ ހަރަކާތެއްކަމަށް އެޗްޑީސީން ބުނެ އެވެ. އެގޮތުން، މި ޕްރޮގްރާމްގައި ބައިވެރިވާން އެދޭ އިސްރަށްވެހިންނަށް ރަޖިސްޓްރޭޝަނާއި ސެޝަންތަކުގައި ބައިވެރިވުން މުޅިން ހިލޭ ހަމަޖެހިގެންދާނެކަމަށް އެޗްޑީސީން ބުނެ އެވެ.
މި ހަރަކާތާއެކު ކޮންމެ ހަފްތާއަކުވެސް ތިން ދުވަހު، އިސްރަށްވެހިންގެ އުމުރާ ގުޅޭގޮތަށް ރޭވިފައިވާ ލުއި ކަސްރަތުތަކާއި، ހިނގުމާއި، ސްޓްރެޗިން އަދި ނޭވާލުމުގެ ކަސްރަތުތައް ކުރިއަށްގެންދާނެއެވެ. އަދި "ގޯލްޑަން އަވާ"ގެ ނަމުގައި ހަފްތާއަކު އެއްފަހަރު ނުވަތަ ކޮންމެ ދެ ހަފްތާއަކުން އެއް ދުވަހު، އިސްރަށްވެހިންނަށް ހާއްސަކޮށްގެން ބާއްވާ ހަވީރުގެ ސައެއް އޮންނާނެކަމަށް އެޗްޑީސީން ބުނެ އެވެ.
އޭގެ އިތުރުން، މަހަކު އެއްފަހަރު ކުޑަގިރި ނުވަތަ އެނޫންވެސް ހިތްފަސޭހަ ކައިރި ރަށަކަށް ދަތުރުގޮސް، އުފާވެރި މާހައުލެއްގައި އިސްރަށްވެހިންނަށް ވަގުތު ހޭދަކުރުމަށް ހާއްސަ ހަރަކާތަކާއި، އަހަރުގެ ކޮންމެ ކުއާޓަރަކު އެއްފަހަރު، އިސްރަށްވެހިންގެ ލޭގެ ޕްރެޝަރު ބެލުން ފަދަ މެޑިކަލް ޗެކަޕްތައް ހެދުމާއި، ކުޑަކުދިންނާއި ޒުވާނުންނަށް އިސްރަށްވެހިންގެ ފަރާތުން ސަގާފީ މައުލޫމާތު ހިއްސާކުރުމުގެ ހަރަކާތްތައް ބޭއްވުމަށް މި ޕްރޮގުރާމުގެ ތެރެއިން ހަމަޖެހިފައިވާކަމަށްވެސް އެޗްޑީސީން ބުނެ އެވެ.
"ދުޅަހެޔޮ އިސްރަށްވެހިން" ޕްރޮގްރާމް ފެށުމުގެ ތެރެއިން
މި ޕްރޮގްރާމްގެ ހުރިހާ ހަރަކާތްތަކެއްގައިވެސް ބައިވެރިންގެ ރައްކާތެރިކަމާއި ސިއްހީ ހާލަތަށް ހާއްސަ ސަމާލުކަމެއް ދިނުމުގެ ގޮތުން ބައިވެރިންނަށް ބޭނުންވާ ދަތުރުފަތުރުގެ އިންތިޒާމުތައް ހަމަޖައްސައިދިނުމުގެ އިތުރުން، ސެޝަންތައް ކުރިއަށްދާ ވަގުތު ފަސްޓްއެއިޑްގެ ހިދުމަތާއި، ބޯފެނާއި އަރާމުކުރާނެ އިންތިޒާމުތައް ހަމަޖައްސާފައި ހުންނާނެކަމަށް އެޗްޑީސީން ބުނެ އެވެ.
މި ޕްރޮގްރާމަކީ އެޗްޑީސީއާއި މިނިސްޓްރީ އޮފް ހެލްތު އަދި، ހުޅުމާލެ ހޮސްޕިޓަލާއި، ފުލުހުންނާއި، ފިޒިއޯ ސޮލިއުޝަންސްގެ އިތުރުން ޕެންޝަން އޮފީހާއި، އެމްޓީސީސީއާއި، އުރީދޫ އަދި އެކިއެކި އެންޖީއޯތަކުގެ އެއްބާރުލުމާއެކު ކުރިއަށްގެންދާ ޕްރޮގުރާމެކެވެ. އެޗްޑީސީގެ އަމާޒަކީ، މި ޕްރޮގްރާމްގެ ސަބަބުން އިސްރަށްވެހިންގެ ސިއްހީ އަދި ނަފްސާނީ ދުޅަހެޔޮކަން އިތުރުވެ، މުޅި ހުޅުމާލެއަކީ ހުރިހާ އުމުރެއްގެ ރައްޔިތުންނަށްވެސް އުފަލާއެކު އުޅެވޭނެ ހިތްފަސޭހަ މުޖުތަމައަކަށް ހެދުންކަމަށް އެޗްޑީސީން ބުނެ އެވެ.
