މިހާރު ހިނގަމުންދާ ދިރާސާ އަހަރުގައި ދެވަނަ ޓާމުގެ ކިޔެވުން ކުރިއަށްދާއިރު، ދަރިވަރުންނަށް ޗުއްޓީ ވާނީ ޑިސެންބަރު 18އިން ފެށިގެންނެވެ.
އެޑިއުކޭޝަން މިނިސްޓްރީން ރޭ ވަނީ އަންނަ ދިރާސީ އަހަރުގެ އެކެޑެމިކް ކަލަންޑަރު ހާމަކޮށްފައެވެ.
އެ ކަލަންޑަރުގައިވާ ގޮތުން، ދިރާސީ އަހަރުގެ ކިޔެވުން ފެށޭނީ އަންނަ ޖަނަވަރީ 17ގައެވެ.
ކަލަންޑަރުގައިވާ ގޮތުން، ދަރިވަރުންނަށް އަންނަ އަހަރު ކިޔަވައިދޭނީ، 163 ދުވަހެވެ. އެއީ ފަސް މަހެއްހާ ދުވަސް ކަމަށްވާއިރު، ޖުމުލަ ޗުއްޓީއަށް 88 ދުވަސް ލިބެ އެވެ. އެއީ، ތިން މަހެއްހާ ދުވަހުގެ މުއްދަތެވެ.
އެކެޑަމިކް ކަލަންޑަރުން ދައްކާ ގޮތުގައި، ފުރަތަމަ ޓާމުގެ ޗުއްޓީ ނިންމުމަށްފަހު ދެވަނަ ޓާމުގެ ކިޔެވުމަށް ދަރިވަރުން ނިކުންނާނީ އޮގަސްޓު މަހުގެ އެއްވަނަ ދުވަހެވެ. އެއަށްފަހު ދެވަނަ ޓާމުގެ ކިޔެވުންތައް ނިންމައި، ޓެސްޓު ނޮވެމްބަރު މަހުގެ 23 އިން ފެށިގެން ޑިސެމްބަރު މަހުގެ ދެވަނަ ދުވަހުގެ ނިޔަލަށް ކުރިއަށްދާނެ އެވެ.
އެއާއެކު، ޑިސެމްބަރު މަހުގެ ފަސްވަނަ ދުވަހު ރިޕޯޓު ފޮތް ދިނުމަށްފަހު އެ މަހުގެ ނުވަ ވަނަ ދުވަހު ދިރާސީ އަހަރުގެ ކިޔެވުން ނިންމައި ދަރިވަރުން ޗުއްޓީއަށް ދާނެ އެވެ. އެ މުއްދަތުގައި ދަރިވަރުންނަށް މަސް ދުވަހުގެ ޗުއްޓީއެއް ލިބޭނެ އެވެ.
ބޮޑު ޗުއްޓީ ޑިސެމްބަރުގައި ލިބޭ ގޮތަށް އެކެޑެމިކް ކަލަންޑަރު ބަދަލުކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
