މި މައްސަލައިގައި ހައްޔަރުކޮށްފައިވަނީ ކ. މާފުށި / ސްނޯސްކައި، އަޙްމަދު ފާރިޒް (26 އ) އެވެ. އޭނާ މިހާރު ދިރިއުޅެނީ ހުޅުމާލެ މަށި 7 ގައެވެ.
ކްރިމިނަލް ކޯޓުގެ ބަންދު އަމުރުގައިވާ ގޮތުން، ފާރިޒް ވަނީ ނަންބަރު ބޯޑު ނެތް ސައިކަލެއްގައި ހެލްމެޓު ނާޅައި، އާންމުންގެ ފުރާނައަށް ނުރައްކާވާ ގޮތަށް ސައިކަލު މަތީ އޮށޯވެގެން ދުއްވާފައެވެ. އަދި އޭނާ ހުއްޓުވަން މަސައްކަތްކުރި ފުލުހުންގެ އަމުރަށް ނުކިޔަމަންތެރިވެ، ފުލުހުންގެ ސައިކަލެއްގައި ޖެއްސި ކަމުގެ ތުހުމަތުވެސް އޭނާގެ މައްޗަށް ކުރެވެއެވެ.
އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ގާޟީ އިބްރާހީމް ޒިހުނީ ވަނީ މުޖުތަމައުގެ ސަލާމަތަށްޓަކައި އޭނާ 7 ދުވަހަށް ބަންދުކުރުމަށް އަމުރުކުރައްވާފައެވެ.
މި ފަހުން މާލެ، ހުޅުމާލެ އަދި ބުރިޖު ހައިވޭގައި ބާރުސްޕީޑުގައި ނުރައްކާތެރިކޮށް ދުއްވައިގެން ހިނގި އެކްސިޑެންޓްތަކުގައި ބައެއް މީހުންގެ ފުރާނަ ގެއްލި، ގިނަ ބަޔަކަށް ބޮޑެތި އަނިޔާތަކެއް ލިބިފައިވާއިރު، ފުލުހުން ދަނީ ގަވާއިދާ ހިލާފަށް ދުއްވާ ފަރާތްތަކާމެދު ފިޔަވަޅު އަޅަމުންނެވެ.
