މި ދިރާސާގެ ނަތީޖާއިން އެނގޭ ގޮތުގައި އަންހެން ޑޮކްޓަރުންގެ އަޅާލުމާއެކު ހޮސްޕިޓަލުގައި ފަރުވާ ހޯދާ ބަލިމީހުންގެ މަރުވުމުގެ ނިސްބަތް ކުޑައެވެ.
ކެނެޑާގެ ސިއްޙީ ދާއިރާއިން ކުރިއަށްގެންދިޔަ މި ފުޅާ ދިރާސާގައި، ހޮސްޕިޓަލުގައި އެނދުމަތިކޮށްގެން ފަރުވާދީފައިވާ ގާތްގަނޑަކަށް އެކެއް މިލިއަން ބަލިމީހުންގެ މަޢުލޫމާތު ވަނީ ތަޙުލީލުކޮށްފައެވެ. މި ދިރާސާއިން ހާމަވި ގޮތުގައި، ފިރިހެން ޑޮކްޓަރުންނާ އަޅާބަލާއިރު އަންހެން ޑޮކްޓަރުން ފަރުވާ ދެއްވި ބަލިމީހުން، ހޮސްޕިޓަލުން ދޫކޮށްލާތާ 30 ދުވަހުގެ ތެރޭގައި މަރުވުމުގެ ނިސްބަތް ވަރަށް ބޮޑަށް ކުޑައެވެ. މީގެއިތުރުން، ފަރުވާ ދިނުމަށްފަހު ދޫކޮށްލާ ބަލިމީހުން އަލުން ހޮސްޕިޓަލުގައި އެނދުމަތިކުރަންޖެހޭ ނިސްބަތްވެސް އަންހެން ޑޮކްޓަރުން ބެއްލެވި ބަލިމީހުންގެ މެދުގައި ވަރަށް ބޮޑަށް ކުޑަކަން ފާހަގަކުރެވުނެވެ.
ދިރާސާކުރި ރިސާޗަރުން ބުނާ ގޮތުގައި، މި ދެ ޖިންސުގެ ޑޮކްޓަރުންގެ ފަރުވާއިން މިފަދަ ތަފާތެއް ފެންނަން މެދުވެރިވި މުހިންމު ސަބަބުތަކުގެ ތެރޭގައި އަންހެން ޑޮކްޓަރުންގެ މުވާޞަލާތުކުރުމުގެ ވައްޓަފާޅިއާއި ކްލިނިކަލް އުސޫލުތަކަށް ފުރިހަމައަށް ތަބާވުން ހިމެނެ އެވެ. އަންހެން ޑޮކްޓަރުން ބަލިމީހުންނާ ވާހަކައްކައި މަޢުލޫމާތު ހިއްސާކުރުމުގައި ގެންގުޅޭ އުސޫލުތަކާއި، ސިއްހީ އިރުޝާދުތަކާއި ގަވާއިދުތަކަށް ބޯލެނބުމުގެ ނިސްބަތް އިތުރުވުމަކީ ބަލިމީހުންގެ ޙާލަތު ރަނގަޅުވެ ފުރާނަ ސަލާމަތްވުމަށް މަގުފަހިވާ މުހިންމު ސަބަބެއް ކަމަށް ދިރާސާވެރިން ފާހަގަކުރެ އެވެ.
މި ދިރާސާއަކީ ސިއްހީ ހިދުމަތުގެ ފެންވަރު މަތިކުރުމަށާއި، ބަލިމީހުންނަށް ދެވޭ ފަރުވާގެ ނަތީޖާ ރަނގަޅުކުރުމަށްޓަކައި ޑޮކްޓަރުންގެ މުވާސަލާތީ ހުނަރާއި ކްލިނިކަލް އުސޫލުތަކަށް ތަބާވުމުގެ މުހިންމުކަން ހާމަކޮށްދޭ މުހިންމު ހޯދުމެކެވެ.
