ރަސްމާލެ މަޝްރޫއާ ދެކޮޅަށް ސީދާ ހަރަކާތަށް ނުކުތުމަށް އެމްޑީޕީގެ ގައުމީ މަޖިލީހަށް ހުށަހަޅާފައިވާ ގަރާރާ ގުޅިގެން މިރޭ ބޭއްވި ކުއްލި ބައްދަލުވުމުގައި އެ ގަރާރަށް ކުރި ބަހުސްގެ ތެރެއިން ނަޝީދު ވިދާޅުވީ އެ މަނިކުފާނު ހުންނެވީ އެ ބަހުސްގައި ބައިވެރިވެވަޑައިގަންނަވާ ގޮތަށް ނޫން ނަމަވެސް ބައެއް ބޭފުޅުން އެ މަނިކުފާނުގެ ނަން ގެންނެވުމުން އެ މައުލޫއަށް އެއްޗެއް ދަންނަވަން ޖެހުނީ ކަމަށެވެ. 

މިހާތަނަށްވެސް ނަޝީދު ވިދާޅުވަމުން ގެންދަވަނީ ބޭރުގެ ބޮޑެތި މަޝްރޫއުތައް ރާއްޖެ އަންނަ ޖެހޭކަމަށް ދެކެވަޑައިގަންނަވާކަމަށެވެ. ރަސްމާލެ މައްސަލާގައި އޮތް ހަމައެކަނި ކަންބޮޑުވުމަކީ ސަރުކާރުން ކަންކަން ހާމަނުކުރުމާއި މާލެ ސަރަހައްދުގައި އެފަދަ ބޮޑު މަޝްރޫއުއެއް ހިންގުންކަމަށް ނަޝީދު ވަނީ ވިދާޅުވެފަ އެވެ. 

ރަސްމާލެއިން 500 ހެކްޓަރު ބިން 99 އަހަރަށް ދުބާއީގެ އީގަލްސް ހިލްސް ކުންފުންޏަށް ދިނުމަށް ސަރުކާރުން ނިންމާފައިވާތީ އެކަމާއި ގުޅިގެން ބޮޑެތި ފާޑުކިޔުންތައް ސަރުކާރަށް ވަނީ އަމާޒުވެފަ އެވެ. އެގޮތުން އިދިކޮޅު ފަރާތްތަކުގެ އިތުރުން ބައެއް އިލްމުވެރިންނާއި މި ސަރުކާރުގައި ކުރިން އިސްކޮށް މަސައްކަތް ކުރެެއްވި ބައެއް ބޭފުޅުންނާއި ގިނަ އަދަދެއްގެ އާއްމުން އަންނަނީ ރަސްމާލެ ބޭރު ބަޔަކަށް ދިނުމުގައި ކަންބޮޑުވުންތަކެއް ހުރިކަމަށް ބުނަމުން ނެވެ.

އެމްޑީޕީގެ ގައުމީ މަޖިލިސް މިރޭ މި ބާއްވަނީ ރަސްމާލޭ މަޝްރޫއު ކުރިއަށްގެންދިޔުމުގެ ކުރިން ރައްޔިތުންގެ ފެންނަ ނުފެންނަ ވޯޓެއް ނެގުމަށް ގޮވާލައި ހުށަހަޅާފައިވާ ގަރާރާމެދު ގޮތެއް ނިންމުމަށެވެ.

ކޮލަމާފުށީ ދާއިރާގެ ރައީސް މަހްފޫޒް ސައީދު ހުށަހެޅުއްވި އެ ގަރާރުގައި ގޮވާލާފައި ވަނީ ރަސްމާލެ މަޝްރޫއުއާމެދު ދެކޭ ގޮތް ބަލަން އާންމުންގެ މެދުގައި ވޯޓެއް ނެގުމަށާއި އެފަދަ ވޯޓަކަށް ސަރުކާރު އެއްބަސްނުވެއްޖެ ނަމަ މަޝްރޫއު ހުއްޓުވުމަށް މުޒާހަރާ ކުރުމަށެވެ. 

ގާނޫނުއަސާސީގެ 251 ވަނަ މާއްދާއާ ހަވާލާދީ ގަރާރުގައި ވަނީ، އެ މާއްދާގައިވާ ގޮތުން ރާއްޖޭގެ އެއްވެސް ސަރަހައްދެައް ބޭރުގެ ފަރާތްތަކަށް މިލްކުކޮށެއްނުދެވޭނެ އެވެ. އަދި މި މަޝްރޫއުގެ ދަށުން ނިމުމެއްނެތް 99 އަހަރަށް ތަަންތަން ކުއްޔަށް ދެވޭ ގޮތަށް އޮތުމަކީ، ރާއްޖެއިން ބޭރުގެ ފަރާތްތަކަށް ދާއިމަށް އެތަނުގެ މިލްކުވެރިކަން ލިބި، ރާއްޖޭގައި ވަޒަންވެރިވުމުގެ ފުރުސަތު ގާއިމްވެގެން ދިއުން ކަމުގައި ބެލެނޭ އެވެ.