އެ ހިދުމަތް އިފްތިތާހުކޮށްދެއްވީ އެންވަޔަރްމެންޓް މިނިސްޓަރު އަލީ ޝަރީފެވެ.
"މޫސުން" އެޕް މިހާރު އެޕަލް އެޕް ސްޓޯރުންނާއި ގޫގުލް ޕްލޭ ސްޓޯރުން ޑައުންލޯޑް ކުރެވޭނެ އެވެ. އަދި މެޓް އޮފީހުގެ އާ ވެބްސައިޓު ވެސް މިއަދުން ފެށިގެން ބޭނުން ކުރެވޭނެ އެވެ.
މި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރު އަލީ ވިދާޅުވީ އިފްތިތާހު ކުރެވިގެންދިޔަ އެޕާއި ވެބްސައިޓްގެ ޒަރީއާއިން ބޭނުންވަނީ އާންމުންނަށް ބޭނުންކުރުމުގައި ލުއިފަސޭހަ، އަދި ދުވަހުން ދުވަހަށް މޫސުމާ ގުޅޭ އެންމެ ސައްހަ އަދި ތަފްސީލީ މައުލޫމާތު ފަސޭހަކަމާއެކު ހޯދޭނެ ފުރިހަމަ ވަސީލަތެއް ފޯރުކޮށްދިނުން ކަމަށެވެ.
މި ބަދަލާއެކު، ރާއްޖޭގެ އެކި ސަރަހައްދުތަކަށް ބޭނުންވާ މޫސުމީ މައުލޫމާތާއި ނުރައްކާތަކުގެ ކުރީގެ އިންޒާރު އާންމުންނަށް އަވަހަށް އަދި ފަސޭހަކަމާއެކު ލިބިގެންދާނެ އެވެ.
މެޓް އޮފީހުގެ އާ ވެބްސައިޓް މިއަދުން ފެށިގެން އާންމުންނަށް ބޭނުންކުރެވޭނެއެވެ. އަދި "މޫސުން" އެޕްލިކޭޝަންގެ އާ ވާޝަން އައިއޯއެސް އަދި އެންޑްރޮއިޑް ފޯނުތަކަށް މިހާރު ޑައުންލޯޑް ކުރެވޭނެ އެވެ.
މިނިސްޓްރީން ބުނި ގޮތުގައި އާންމުންނާއި ދަތުރުފަތުރުކުރާ މީހުންނާއި އެކި ހަފްލާތައް އިންތިޒާމުކުރާ ފަރާތްތަކަށް އަމާޒުކޮށްފައިވާ އެ ވެބްސައިޓާއި މޯބައިލް އެޕް މެދުވެރިކޮށް ވަގުތުން ވަގުތަށް މޫސުމީ ހާލަތު ދެނެގަތުމާއި ދިޔަވަރު ތާވަލުތަކާއި ކަނޑުގެ ހާލަތު އަދި މޫސުމީ ކުއްލި އިންޒާރުތަކުގެ ނޮޓިފިކޭޝަންތައް ބަލާލެވޭނެ އެވެ.
