ސަރުކާރަށް ތިން އަހަރު ފުރުމުގެ މުނާސަބާ ފާހަގަކުރުމަށް ހުޅުމާލޭގެ ސެންޓްރަލް ޕާކުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، މި ސަރުކާރަށް ބަޖެޓެއް އެކުލަވާލަން ފުރަތަމަ ފުރުސަތު ލިބުނީ 2025 ވަނަ އަހަރަށް ކަމަށެވެ. އަދި ވެރިކަމާ ހަވާލުވެވަޑައިގެންނެވި އަހަރުގެ ބަޖެޓަކީ ކުރީގެ ސަރުކާރުން، އޭރު ރައްޔިތުންގެ މަޖިލީހުގައި އޮތް އެމްޑީޕީގެ ސުޕަމެޖޯރިޓީ ބޭނުންކޮށްގެން، އާ ސަރުކާރަށް ދަތިވާނެ ގޮތަށް ފާސްކުރި ބަޖެޓެއް ކަމަށް އެ މަނިކުފާނު ފާހަގަކުރެއްވި އެވެ.
ރައީސް މުއިއްޒު ވިދާޅުވީ، 2025 ވަނަ އަހަރުގެ ބަޖެޓުން ފެށިގެން ސަރުކާރުން ހަރުދަނާ ފިސްކަލް މެނޭޖްމެންޓެއް ތަންފީޒުކޮށް، ޑެފިސިޓް ވަނީ ޖީޑީޕީގެ ނިސްބަތުން 3.6 ޕަސެންޓަށް ކުޑަކުރެވިފަ އެވެ. އެހެން ނަމަވެސް، މިއަހަރުގެ މާޗް މަހާ ހިސާބުން ފެށިގެން މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ތެލުގެ އަގު އުފުލި، ފަތުރުވެރިކަމަށް ލޮޅުން އެރުމާ ގުޅިގެން ކަންކަން މެނޭޖްކުރުމުގައި ބަދަލުތަކެއް ގެންނަން ޖެހުނު ކަމަށް އެ މަނިކުފާނު ވިދާޅުވި އެވެ. އެ ގޮންޖެހުންތަކާ އެކު ވެސް ސަރުކާރުގެ އަމާޒަކީ 2028 ވަނަ އަހަރު ނިމޭއިރު ބަޖެޓް ޑެފިސިޓް 5 ޕަސެންޓަށް ވުރެ ކުޑަކުރުން ކަމަށާއި، 2029 ވަނަ އަހަރު ޖީޑީޕީގެ ނިސްބަތުން 1 ޕަސެންޓުގެ ސާޕްލަސްއަކަށް ދެވޭނެ ކަމަށް ލަފާކުރެވޭ ކަމަށް ވެސް ރައީސް ވިދާޅުވި އެވެ.
އަންނަ އަހަރަށް ދައުލަތުން ލަފާކުރާ ބަޖެޓުގެ ޖުމްލަ އަދަދަކީ 59.7 ބިލިއަން ރުފިޔާ އެވެ. މިއީ ރާއްޖޭގެ އުފެއްދުންތެރިކަން ނުވަތަ ޖީޑީޕީގެ ނިސްބަތުން 46.1 ޕަސެންޓެވެ. ކޮވިޑްގެ ދުވަސްވަރު ފިޔަވައި ވޭތުވެދިޔަ 10 އަހަރު ދައުލަތުގެ ބަޖެޓް ކޮންމެ އަހަރަކު ވެސް ދިޔައީ ބޮޑުވަމުންނެވެ.
އަންނަ އަހަރުގެ ބަޖެޓުގެ ޖުމްލަ އަދަދު މި ހިނގާ އަހަރަށް ވުރެ ކުޑަ ނަމަވެސް، ބަޖެޓް ޑެފިސިޓް މި އަހަރަށް ވުރެ 1.9 ބިލިއަން ރުފިޔާ ބޮޑުވާނެ ކަމަށް ވަނީ ލަފާކޮށްފަ އެވެ. އެގޮތުން އަންނަ އަހަރުގެ އޯވަރޯލް ޑެފިސިޓް 9.4 ބިލިއަން ރުފިޔާއަށް އަރާނެ ކަމަށް ލަފާކޮށްފައިވާއިރު، މި އަހަރު އެ އަދަދު ހުންނާނެ ކަމަށް ލަފާކޮށްފައިވަނީ 7.5 ބިލިއަން ރުފިޔާގަ އެވެ.
އަންނަ އަހަރުގެ ބަޖެޓުން 52.6 ބިލިއަން ރުފިޔާ ހަރަދުކުރަން ކަނޑައަޅާފައިވާއިރު، އޭގެ ތެރެއިން 42.7 ބިލިއަން ރުފިޔާއަކީ ރިކަރެންޓް ހަރަދެވެ. އެއީ މުޅި ބަޖެޓުގެ 71.5 ޕަސެންޓެވެ. ދެވަނައަށް އެންމެ ބޮޑު ހޭދައެއް ކަނޑައަޅާފައިވާ ކެޕިޓަލް ހަރަދަށް ލަފާކޮށްފައިވަނީ 9.8 ބިލިއަން ރުފިޔާ އެވެ.