ތައިލެންޑުގެ ފޮރިން މިނިސްޓްރީން އިސްނަގައިގެން ރާއްޖެއަށް އެ އެހީތެރިކަން ފޯރުކޮށްދޭން ނިންމާފައި ވަނީ ކޮވިޑް-19 އަށް ފަރުވާ ކުރުމަށް ބޭނުންވާ ބޭހާއި ސިއްހީ އާލާތްތައް ރާއްޖެއަށް ވަރަށް ބޮޑަށް ބޭނުންވެ، އެކަމަށް ދިވެހި ސަރުކާރުން އެދިފައިވާތީ ކަމަށް ސްރީލަންކާގައި ހުންނަ ތައިލޭންޑުގެ އެމްބަސީން ބުނެ އެވެ.
ރާއްޖޭގައި ހުންނަ ތައިލެންޑު ކޮންސިއުލޭޓުން ވެސް އެ ޕޯސްޓް ޝެއާކޮށްފައިވާއިރު އޭގައި ވަނީ ރާއްޖެއަށް ހަދިޔާކުރާ މިނީ އިމަޖަންސީ ވެންޓިލޭޓަރުތަކަކީ ކޭއެމްއައިޓީއެލުގެ އިންޖީނިއަރިން އަދި މެޑިސިން ފެކަލްޓީ އާއި އާކިޓެކްޗާ ފެކަލްޓީ ގުޅިގެން އުފައްދާފައިވާ އުފެއްދުމެއް ކަމަށެވެ.
ރާއްޖެއަށް ހަދިޔާކުރާ ތަކެތި އުފެއްދުމުގެ މަސައްކަތް މިހާރު ކުރަމުން އަންނައިރު އެތަކެތި ޖޫން މަސް ނިމުމުގެ ކުރިން ރާއްޖެއަށް ފޯރުކޮށްދެވެނެ ކަމަށް ވެސް ބުންޏެވެ.
އޭގެ އިތުރުން އެމްބަސީން ބުނެފައި ވަނީ އެގައުމުގެ އަމިއްލަ ކުންފުނިތަކުން ވެސް ރާއްޖެއަށް ސިއްހީ އާލާތްތައް ފޯރުކޮށްދިނުމުގައި އެހީތެރިކަން ފޯރުކޮށްދީފައިވާ ކަމަށެވެ. އެގޮތުން ޕާސަނަލް ޕްރޮޓެކްޓިވް އިކުއިޕްމަންޓްސް (ޕީޕީއީ) އާއި ޑިސްއިންފެކްޓް ކުރާނެ ސާމާނު ރާއްޖެއަށް ހަދިޔާކޮށްފައިވާކަން ފާހަގަކުރެ އެވެ.
