އެމްޑަބްލިއުއެސްސީން މިއަދު ނެރުނު ބަޔާނުގައި ބުނީ ފެނާއި ނަރުދަމާގެ ހިދުމަތް ކަސްޓަމަރުންނަށް ފޯރުކޮށްދިނުމަކީ އެކުންފުނީގެ އަމާޒަކަށްވާއިރު ބިލު ދެއްކުމުގައިވެސް ކަސްޓަމަރުންނަށް ދިމާވާ ދަތިތައް ހައްލުކުރުމަށް އެހީތެރިކަން ފޯރުކޮށްދެމުން އަންނަކަމަށެވެ.

އެގޮތުން ބިލަށް ފައިސާ ދެއްކުމަށް ދަތިވެފައިވާ ފަރާތްތަކަށް އެހީތެރިވުމަށް މިދިޔަ އަހަރުގެ ޑިސެންބަރު މަހުގެ ތެރޭގައި ހާއްސަ ޕްރޮގްރާމެއް ފަށާފައިވާކަމަށާއި ކޮވިޑްގެ ފުރަބަންދާ ގުޅިގެން އެ ޕްރޮގްރާމު ބޭނުންކުރާ ކަސްޓަމަރުން މަދުކަމަށް އެމްޑަބްލިއުއެސްސީން ފާހަގަކުރެއެވެ. އެހެންކަމުން "ދަރަންޏަށް ލުއި“ ޕްރޮގްރާމުގައި ބައިވެރި ވުމުގެ މުއްދަތު އިތުރުކޮށްފައިވާކަމަށް އެމްޑަބްލިއުއެސްސީ އިން ބުނެ އެވެ.

އޭގެ އިތުރުން ބަޔާނުގައި ބުނީ  ކަސްޓަމަރުންނަށް ލިބުނު ފުރުސަތުގެ ބޭނުން ހިފާ ދަރަނީގެ ފައިސާ ދެއްކެވުމަށް އެކުންފުނިން އެދޭކަމަށެވެ. އަދި އެ ޕްރޮގްރާމާ ގުޅޭ މައުލޫމާތު ބޭނުންވާ ފަރާތްތަކުން އެކުންފުނީގެ 24 ގަޑިއިރު ގުޅޭ ކަސްޓަމާ ކެއާ ހޮޓްލައިން ނަމްބަރު 105 އަށް ގުޅުމުން ލިބޭނެކަމަށްވެސް މައުލޫމާތު ދީފައިވެއެވެ. އަދި 1050 އަށް އެސްއެމްސް ކުރައްވައިގެންނާއި، [email protected]  އަށް މެއިލް ކުރުމުން ލިބޭނެކަމަށް ބުނެފައިވެއެވެ.