މައިމޫނާ ހޮސްޕިޓަލްގައި އެޑްމިޓް ކުރެވުނު އަޑުތައް މީޑިއާގައި ފެތުރެން ފެށުމާއި ގުޅިގެން ސީއެންއެމްއިން ސުވާލުކުރުމުން މަބްރޫކް ވިދާޅުވީ އިއްޔެގެ ކުޑަ ވަގުތުކޮޅަކަށް އެޑްމިޓް ކުރެވިގެން ދިޔަ ކަމުގައި ވީނަމަވެސް މިހާރު އެކަމަނާ ހުންނެވީ ގޭގައި ހެޔޮ ހާލުކޮޅުގައި ކަމަށެވެ.
މައިމޫނާ ހޮސްޕިޓަލަށް ގެންދެވުނީ ކޮވިޑާއި ގުޅުން ހުރި ކަމެއްގައި ނޫން ކަމުގައި މަބްރޫކް އިތުރަށް ވިދާޅުވެފައިވެއެވެ. އަދި އެއީ ޒާތީ މައުލޫމާތުތަކަަށް ވުމުން މިކަމާ ގުޅޭ އިތުރު ތަފްސީލު މަބްރޫކު ހާމަ ކުރައްވާފައެއް ނުވެއެވެ.
މަބްރޫކް ވިދާޅުވީ މައިމޫނާގެ މާ ސީރިއަސް ކަމެއް ނެތް ކަމަށާއި އިއްޔެ ހޮސްޕިޓަލުގައި އެޑްމިޓްކުރުމަށްފަހު މިހާރު ގެއަށް ދޫކޮށްލާފައިވާ ކަމަށެވެ. އަދި އެކަމަނާގެ ހާލުކޮޅު ރަނގަޅުކަމަށާއި މިއަދު ހެނދުނު ނެޝެނަލް އިމަޖެންސީ އޮފަރޭޝަން ސެންޓަރަށްވެސް ވަޑައިގެންފައިވާ ކަމަށް އޭނާ ވިދާޅުވިއެވެ.
ޑިރެކްޓަރ ޖެނެރަލް އޮފް ޕަބްލިކް ހެލްތުގެ ހައިސިއްޔަތުން މައިމޫނާއަކީ ކޮވިޑް-19 އާއި ގުޅުން ހުރި މުހިއްމު ގިނަ ނިންމުންތަކެއް ނިންމުމުގެ ބާރު ޤާނޫނުން ލިބިވަޑައިގަންނަވާ ފަރާތެވެ. މައިމޫނާ ސިއްހީ ދާއިރާގައި މަސައްކަތް ކުރައްވާތާ 30 އަހަރަށް ވުރެ ގިނަދުވަސް ވެއްޖެއެވެ. ސިއްހީ ނުރައްކަލުގެ ހާލަތު ރާއްޖޭގައި އިއުލާނު ކުރުމާއި ކޮވިޑް-19 އާއި ގުޅިގެން މިހާތަނަށް އަޅަން ޖެހޭ ހުރިހާ ފިޔަވަޅުތަކެއް އަޅާފައިވަނީ އެކަމަނާގެ ބެއްލެވުމުގެ ދަށުންނެވެ.
