މިކަމާއި ގުޅިގެން މަޖްލީހުން މިއަދު ކޮށްފައިވާ އިއުލާނުގައި ބުނެފައިވަނީ މި ބިލަށް އެއްވެސް ފަރާތެއްގެ ހިޔާލެއް ނުވަތަ ކޮމެންޓެއް އޮތްނަމަ މިހިނގާ ޖޫން މަހުގެ 30 ވާ އަންގާރަ ދުވަހުގެ 14:00 ގެ ކުރިން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއަށް ލިޔުމުން ނުވަތަ މެއިލްގެ ޒަރިއްޔާއިން ފޮނުވައި ދިނުމަށެވެ.
ފުލުހުންގެ ބިލު މަޖިލީހަށް ހުށަހަޅާފައިވަނީ ސަރުކާރުގެ ފަރާތުން ހެންވޭރު ހުޅަނގު ދާއިރާގެ މެންބަރު ހަސަން ލަތީފެވެ.
ފުލުހުންގެ ހިދުމަތުގެ ބިލުގެ މަސައްކަތް މަޖިލީހުގައި ކުރިއަށް ދާއިރު، ހޯމް މިނިސްޓަރު އިމްރާން އަބްދުﷲ އާއި ކޮމިޝަނާ އޮފް ޕޮލިސް މުހައްމަދު ހަމީދު ވަނީ ފުލުހުންގެ މުއައްސަސާ ރިފޯމް ކުރުމަށް ކުރަމުން އަންނަ މަސައްކަތަށް މިބިލަކީ މުހިންމު ބިލެއްކަން ފާހަގަކޮށްފައެވެ.
މަޖިލީހުގައި ފުލުހުންގެ ބިލާއި ގުޅޭގޮތުން ކުރިއަށްދިޔަ ބަހުސްގައި މެމްބަރުން ވަނީ ފުލުހުންގެ ފަރާތުން ރައްޔިތުންނަށް ކުރިމަތިވެފައިވާ އަނިޔާވެރިކަމާއި ގުޅޭގޮތުން ވާހަކަދައްކާފައެވެ. އަދި އެކި މައްސަލަތަކުގައި ފުލުހުންގެ މުއައްސަސާގައި ހިމެނޭ އެކި ފަރާތްތަކުގެ މައްޗަށް ކުރެވޭ ބޮޑެތި ތުހުމަތުތައް މެމްބަރުން ފާހަގަކޮށްފައިވާއިރު ފުލުހުންގެ އިދާރާ ރިފޯމް ކުރުމަށް މި ބިލުގެ މުހިންމު ކަން މެމްބަރުން ފާހަގަކޮށްފައިވެއެވެ.
