މިރޭ ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ޑރ. މުއާޒު މޫސާ ވިދާޅުވީ، ބޭރަށް ނިކުންނައިރު ކޮންމެ މީހަކީ ވެސް ބަލި ހުރެދާނެ މީހެއް ކަމަށް ބަލާއި ފިޔަވަޅު އަޅަން ޖެހޭ ކަމަށެވެ. އެގޮތުން ކޮންމެހެން މީހަކަށް ބައްދަލުކުރަން ޖެހިއްޖެ ހާލަތެއްގައި ބައްދަލުކުރާއިރު ވެސް އެގޮތަށް ފިޔަވަޅުތައް އެޅުމަށް ޑރ. މުއާޒު ވިދާޅުވެ އެވެ.
އޭގެ އިތުރުން ކޭސްތައް އިތުރުވެ ކޮންޓްރޯލުން ނައްޓައިގެން ދިއުމުގެ ކުރިން އެކަމަށް ސަމާލުވާން ޖެހެ އެވެ.
އެ ނޫސްވެރިންގެ ބައްދަލުވުމުގައި ޑރ. އިބްރާހީމް އަފްޒަލް ވިދާޅުވީ، މިހާރު ދީފައިވާ ލުއިތަކާއެކު ރައްކާތެރިކަމުގެ ފިޔަވަޅުތައް ނާޅާއި، އުޅޭނަމަ، ނުވަތަ ޑޮކްޓަރުން ދެމުން އަންނަ އިރުޝާދުތަކަށް ބޯނުލަނބާނަމަ ކޭސްތައް ފެންނަ މިންވަރު އިތުރުވެދާނެ ކަމަށެވެ.
އޭގެ އިތުރުން ޑރ. އަފްޒަލް ވިދާޅުވީ މިހާރު ފެނިފައިވާ ކޭސްތަކުން އަދި އަނބުރާ ލޮކްޑައުންއަކަށް ދާވަރު ނުވާ ކަމަށެވެ. އެކަމަކު، އެހެންކަމުން، އާންމުން ރައްކާތެރިކަމުގެ ފިޔަވަޅުތަކަށް އިތުރަށް ސަމާލުވުމަށް ޑރ. އަފްޒަލް އެދިވަޑައިގަތެވެ.