ސީއެންއެމްގެ "އިތުރުކާފު" ޕްރޮގްރާމުގައި މިރޭ ބައިވެރިވެވަޑައިގެން އުމަރު ވިދާޅުވީ، އޭނާއަށް ޔަގީންވެ ވަޑައިގަންނަވާ ގޮތުގައި ރާއްޖޭގައި މީގެ ކުރިން ރައީސްކަން ކުރައްވާ، ނާކާމިޔާބީއާ ކުރިމަތިވެވަޑައިގެންނެވި އެއްވެސް ބޭފުޅަކަށް ދެން ރިޔާސީ އިންތިހާބެއް ކާމިޔާބު ނުކުރެއްވޭނެ ކަމަށެވެ.
އޭގެ އިތުރުން އުމަރު ވިދާޅުވީ، ކުރީގެ ރައީސް އަބްދުﷲ ޔާމީން، ޕީޕީއެމްގެ ޓިކެޓުގައި ވާދަކުރެއްވިޔަސް ދެން ކާމިޔާބުވެވަޑައިނުގަންނަވާ ކަމަށެވެ. އަދި އެކަން އެމަނިކުފާނުގެ އަރިހުގައި ވެސް ދަންނަވާފައިވާ ކަމަށް އުމަރު ވިދާޅުވި އެވެ.
އުމަރު ވިދާޅުވީ، ވެރިކަމުގެ އާރާއި ބާރު އޮވެމެ، އިންތިހާބަކުން ނާކާމިޔާބުވެއްޖެނަމަ އެ އާރާއި ބާރު ނެތި، އަލުން އިންތިހާބެއް ކާމިޔާބުކުރުމަކީ ދުނިޔޭގައި ހިނގާފައި އޮތް ކަމެއް ނޫން ކަމަށެވެ.
އުމަރު އިތުރަށް ވިދާޅުވީ، ކުރިން ވެރިކަން ކުރެއްވި ބޭފުޅުން އަލުން ރައީސް ކަމަށް ކުރިމަތިލައްވާނަމަ އެކުރައްވަނީ ބޭކާރު މަސައްކަތަކާއި ބޭކާރު ހަރަދެއް ކަމަށެވެ.
އުމުރު ވަނީ ރައީސް ޔާމީނަކީ އޭނާއަށް ވުރެ ގިނަ ބައެއްގެ ތާއީދު އޮތް ބޭފުޅެއް ނަމަވެސް ދެން "ފިނިޝިން ލައިން" ހުރަސް ނުކުރެއްވޭނެ ކަމަށް ވެސް ވިދާޅުވެފަ އެވެ. އަދި އުމަރު ވިދާޅުވީ ޕީޕީއެމްގެ ދަންމަރު، އޭނާއާ ހަވާލުކުރައްވައިފިނަމަ 2023 ވަނަ އަހަރުގެ ރިޔާސީ އިންތިހާބު އެމްޑީޕީ، ބޮޑު ބައްޔަކުން ބަލިކޮށް އިންތިހާބު ކާމިޔާބު ކުރައްވާނެ ކަމަށެވެ.
