ފުލް ލޮކްޑައުންގައި ދެ މަސްދުވަސް ހޭދަކުރުމަށް ފަހު ލޮކްޑައުނަށް ލުއި ދީފައިވަނީ ނިމުނު މަހުގެ 15 ވަނަ ދުވަހު އެވެ. ލޮކްޑައުނަށް ބޮޑު ލުޔެއް ދިންތާ މަސްދުވަސް ވާން ކައިރިވެފައިވާއިރު، ރާއްޖޭގެ ހާލަތު މިހާރު އޮތް ގޮތާއި މެދު ވިސްނާލުން މުހިންމެވެ.
މިދިޔަ ދެ ދުވަހުގެ ކޮވިޑް19 ގެ ނަތީޖާ ތަކަށް ބަލާލަމާތޯއެވެ.
- މިމަހުގެ ނުވަ ވަނަ ދުވަހު ޖުމުލަ 36 ފަރާތެއް ކޮވިޑް19 އަށް ޕޮޒިޓިވް ވެފައިވެ އެވެ. އޭގެ ތެރެއިން 33 ފަރާތަކީ ދިވެހިންނެވެ.
- މިމަހުގެ ދިހަ ވަނަ ދުވަހު ޖުމުލަ 64 ފަރާތެއް ކޮވިޑް19 އަށް ޕޮޒިޓިވް ވެފައިވެއެވެ. އަދި އޭގެ ތެރެއިން 44 ފަރާތަކީ ދިވެހިންނެވެ.
ފާއިތުވި ދެ ދުވަހުގެ އަދަދު ތަކަށް ބަލާލުމުންވެސް ދިވެހިން މި ބައްޔަށް ޕޮޒިޓިވް ވަމުން އަންނަލެއް އިތުރުވާކަން އެބަ އެނގެއެވެ. އަދި އޭގެ އިތުރުން ބަލި ޖެހޭ މީހުންގެ އަދަދު ހުއްޓުމެއްނެތި އިތުރުވަމުން އަންނަކަން ވެސް ފާހަގަ ކުރެވެއެވެ.
ހެލްތް އިމާޖެންސީ އޮޕަރޭޝަން ސެންޓަރު (އެޗްއީއޯސީ) އިން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ޑރ. އިބްރާހިމް އަފްޒަލް ވިދާޅުވީ ޕޮޒިޓިވްވާ މީހުންގެ ކޮންޓެކްޓުން އިތުރުވަމުން އަންނަ ވާހަކައެވެ.
ޑރ. އަފްޒަލްގެ މިވާހަކައިންވެސް މި ހާމަވަނީ އެންމެ މީހެއްގެ އަމަލުތައް ހުރިގޮތުން އިތުރު އެތައް ބަޔަކު ބައްޔަށް ހުށަހެޅި މުޅި މުޖުތަމައު ނުރައްކަލަކަށް ހުށަހެޅިފައިވާކަމެވެ.
އިންޑިޕެންޑެންޓް ކޭސްތައް އިތުރު، ޑޮކްޓަރުންގެ ކަންބޮޑުވުން އިންތިހާ!
ބްރާސްފަތި ދުވަހުގެ ރޭ އެޗްއީއޯސިން ކުރިއަށް ގެންދިޔަ ނޫސްވެރިންގެ ބައްދަލުވުން އެއްކޮށް ބަލާލުމުން ހާމަވީ އެންމެ ކަމެކެވެ. އެއީ އެއްވެސް ޕޮޒިޓިވް މީހަކާ ގުޅުމެއް ނެތި ބައްޔަށް ޕޮޒިޓިވްވާ މީހުންގެ އަދަދު އިތުރުވާ ކަމެވެ.
މީގެ އިތުރުން ހަމަ އެ ޕްރެސް ކޮންފަރެންސްގައި ޑރ. ނަޒްލާ ރަފީގް ވެސް ވަނީ އިންޑިޕެންޑެންޓް ކޭސްތައް ފެންނަމުން އަންނަވަރު އިތުރުވަމުން އަންނާތީ އެކަމުގެ ޝުއޫރުތައް ފާޅުކޮށްފަ އެވެ. އެގޮތުން ޑރ. ނަޒްލާ ވިދާޅުވީ، ލޮކްޑައުންއަށް ލުއިތައް ދިނުމުން އަނެއްކާ ވެސް، އެކަކު އަނެކަކާ ދިމާވާ މީހުން ވަރަށް ބޮޑަށް ގިނަވާން ފަށާފައިވާ ކަމަށެވެ. ވަކިން ހާއްސަކޮށް ދިވެހިންގެ ތެރޭގައި އެކަން ފާހަގަވެފައިވާކަމަށް ވިދާޅުވި އެވެ. ނަތިޖާ އަކީ އިންޑިޕެންޑެންޓް ކޭސްތައް ފެންނަ މިންވަރު އިތުރު ވުމެވެ.
ކޮވިޑް19 ގެ ހާލަތު ރާއްޖޭގައި މިފަދަ ގޮތަކަށް ހުރިއިރު މިކަމާއި މެދު ވިސްނާ، ލޮކްޑައުނަށް ބޮޑެތި ލުއި ތަކެއް ދީފައި ވީނަމަވެސް، އަމިއްލަ ދިރިއުޅުމުގެ ވައްޓަފާޅި ބަދަލުކޮށް މި ބަލިން އަރައިގަތުމަށް ތިމާގެ ދިރިއުޅުން އާ-އާންމު ހާލަތަކަށް އަމިއްލައަށް ބަދަލުކުރުމަށް ނުވޭތޯ އެވެ؟
