މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ހިޔާނާތުގެ މައްސަލާގައި އަދީބާ ދެކޮޅަށް ދައުލަތުން އުފުލާފައިވާ ހަތް ދައުވާ ކްރިމިނަލް ކޯޓުން ބޭރުކޮށްލި މައްސަލާއާ ގުޅިގެން މައުމޫން ހަމީދު ކޮށްފައިވާ ޓްވީޓްގައި ވިދާޅުވީ މިކަހަލަ ހާލަތެއްގައި ވަކި ގޮތެއް ނިންމުން އަވަސްކުރުމުން، އިސްތިއުނާފް ކުރުމާއި ކަންކަން ހިނގަނީ ރަނގަޅަށްތޯ ބެލުމުގެ ނިޒާމަށް ހުރަސްއެޅިގެން ދާކަމަށެވެ. އަދި އެކަމުގެ ސަބަބުން ފަނޑިޔާރުން ބިރުގަނެ ޝަރުއީ ނިޒާމަށް ހުރަސްތަކެއް އެޅިގެން ދާނެކަން މައުމޫނު ވިދާޅުވި އެވެ.
މި ޓްވީޓް މައުމޫން ހަމީދު ކުރައްވާފައި ވަނީ އަދީބު މިނިވަން ކުރި މައްސަލަ މަޖިލީހަށް ހުށަހެޅިކަމަށް ބުނެ ލިޔެފައިވާ ހަބަރެއް ރީޓުވީޓް ކުރައްވަމުންނެވެ.
އަދީބުގެ މައްޗަށް ދައުލަތުން އުފުލި ހަތް ދައުވާ ކްރިމިނަލް ކޯޓުން ބޭރުކޮށްލި ގޮތާއި މެދު މަޖިލީހުގެ ރައީސް، ހިތްހަމަ ނުޖެހުންފާޅު ކުރެއްވި އިރު އިއްޔަ ބޭއްވި ނޫސްވެރިންގެ ބައްދަލުވުމުގައި ޕީޖީ ހުސައިން ޝަމީމްވެސް ވަނީ މައްސަލަ ބެއްލެވި ގާޒީއަށް ނުހަނު ބޮޑަށް ފާޑުވިދާޅުވެފަ ވެއެވެ.
ކްރިމިނަލް ކޯޓުގެ ގާޒީ އިސްމާއިލް ރަޝީދުގެ މައްސަލަ ޖުޑިޝަލް ސާވިސް ކޮމިޝަން (ޖޭއެސްސީ)އިން ބެލުމަށް ގޮވާލާ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު ހުށަހެޅި މައްސަލަ އާ ގުޅޭގޮތުން ވާހަކަދައްކަވަމުން ރައީސް ނަޝީދު ވިދާޅުވީ އަދީބު މިނިވަންވީ މައްސަލަ ބަލަން އިންނެވި ގާޒީގެ "ގަމާރު" ކަމުން ކަމަށެވެ
