ބިދޭސީންނަށް ރާއްޖޭގައި 10 އަހަރަށް ވުރެ ދިގު މުއްދަތަށް ގެއެއް ކުއްޔަށް ހިފާ ބިދޭސީންނަށް ރެޒިޑެންޓް ވިސާ ދޭ ގޮތަށް އިމިގްރޭޝަންގެ ގާނޫނަށް އިސްލާހު ގެންނަން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްލާހު ހުށަހަޅުއްވުމާއި ގުޅިގެން އިދިކޮޅުން އެކަމުގެ ކަންބޮޑުވުން ފާޅުކޮށް ބޭއްވި ނޫސްވެރިންގެ ބައްދަލުވުމެއްގައި އަބްދުއްރަހީމް ވިދާޅުވީ މިއީ ދިވެހި ރައްޔިތުން ރާއްޖޭގެ ދެވަނަ ދަރަޖައަކަށް ގެންދިއުމަށް ބަޔަކު ކުރަމުން ގެންދާ މަސައްކަތެއް ކަމަށެވެ.
އަބްދުއްރަހީމް ވިދާޅުވީ މިހާރުގެ ސަރުކާރުން ކުރަމުންދާ މަސައްކަތަކީ ދިވެހި ރައްޔިތުންގެ ބާރު ނެތި ގައުމުގެ ވެރިކަމަށް ބޭނުން ބަޔަކު ގެނައުމަށް މަގުފަހި ކުރުމަށް ކުރެވޭ މަސައްކަތެއް ކަމަށެވެ. އަދި މިއީ ރާއްޖެއަށް ތަފާތު ބާތިލް ދީންތައް ފެތުރުމަށް ރޭވިގެން ކުރަމުން ގެންދާ މަސައްކަތެއް ކަމަށްވެސް ތުހުމަތުކޮށްފައިވެ އެވެ. މިކަމާއި ދެކޮޅަށް ރައްޔިތުން ނުކުމެ އަޑު އުފުލުމަށްވެސް އަބްދުއްރަހީމް ވަނީ ގޮވައިލާފަ އެވެ.
މިކަމާއި ގުޅިގެން ބިދޭސީންނަށް ދިވެހިރާއްޖޭގައި ދާއިމަށް ތިބެވޭގޮތަށް ވިސާ ދިނުން ހުއްޓުވަން ކުރަން ޖެހުނު ކޮންމެ ކަމެއް ކުރާނެ ކަމަށް އިދިކޮޅު ޕްރޮގްރެސިވް ކޮންގްރެސް ކޯލިޝަނުން މިއަދު ބޭއްވި މި ބައްދަލުވުމުގައި ބުނެފައިވެއެވެ.