އެމްއެންޑީއެފުން ބުނީ އެ ދޯނި ފަރަށް އަރާފައި ވަނީ ބ.އަތޮޅުން ފުރައިގެން ކ.ތިލަފުއްޓަށް ދަތުރުކުރަމުން ދަނިކޮށް ކަމެވެ.
ދޯނީގައި ތިބި ތިން މީހުންގެ ތެރެއިން އެކަކީ ދިވެއްސެއް ކަމާއި އަނެއް ދެ މީހުންނަކީ ބިދޭސީން ކަމަށް ވެސް އެމްއެންޑީއެފުން ބުނެ އެވެ.
މިއަދު ހެނދުނު 05:46 ހާއިރު އެމްއެންޑީއެފަށް އެ ހާދިސާ ރިޕޯޓްކޮށްފައިވާއިރު އެ ސަރަހައްދުގައި ކޯސްޓްގާޑުގެ ޓީމެއް މިހާރު ދަނީ ހަރަކާތްތެރިވަމުންނެވެ.
ދޯނި ފުންކުރުމުގެ މަސައްކަތުގައި އެމްއެންޑީއެފުން ވަނީ އެހީތެރިކަން ފޯރުކޮށްދީފައެވެ. ދޯނި ފުންކޮށްފައި ވަނީ ދޯނީގެ ވެރި ފަރާތުން ހަމަޖެއްސި އުޅަނދެއްގެ އެހީތެރިކަމާއި އެކު މިއަދު ހެނދުނު 08:40 ގައި ކަމަށް އެމްއެންޑީއެފުން ބުނެ އެވެ.
މޫސުން ގޯސްވުމާއި ގުޅިގެން ކަނޑުމަތީގައި ހިނގަމުންދާ ހާދިސާތައް ގިނައެވެ. އެގޮތުން ފަހަކަށް އައިސް ހަތް ބޯޓު ވަނީ އަޑިއަށް ގޮސްފައެވެ. އަދި ކަނޑު މަތީގައި ތަފާތު ހާދިސާތައް ހިނގަމުން ދިއުމާ ގުޅިގެން މޫސުމަށް ސަމާލު ވުމަށް އެމްއެންޑީއެފް އިން ވަނީ އިލްތިމާސް ކޮށްފައެވެ
