ޕީޖީ އޮފީހުގެ ޕާފޯމެންސް އޮޑިޓެއް ހަދާފައިވަނީ އޮޑިޓް އޮފީހުންނެވެ. އޮޑިޓް އޮފީހުން ހެދި ޕީޖީ އޮފީހުގެ ޕާފޯމަންސް އޮޑިޓުގައި، 2019 ވަނަ އަހަރުން ފެށިގެން އަމަލުކުރަމުން އަންނަ ޖިނާއީ މައްސަލަތަކުގައި އަމަލުކުރާ ސިޔާސަތުގެ ދަށުން، ބަންދު މުރާޖައާ ކުރުން ހަރުދަނާ ގޮތެއްގައި ކޮށްފައިނުވާކަން ފާހަގަކޮށް އެ ކަން އިސްލާހު ކުރަން ލަފާދީފައިވެއެވެ.
މީގެ އިތުރުން ޕްރޮސެކިއުޝަނާއި ޑިއުޓީ ޕްރޮސެކިއުޝަނާއި ގުޅޭ ގިނަ ކަންކަން ހަރުދަނާ ކުރަން ޖެހޭ ކަން ވެސް އޮޑިޓުގައި ފާހަގަކޮށްފައިވެ އެވެ. ބައެއް މައްސަލަތަކުގެ ފުރަތަމަ ޑިއުޓީ ޝެޑިއުލް ބޭއްވުމަށްފަހު މައްސަލަ ތަހުގީގު ކުރުމަށް ގިނަ ދުވަސްތަކެއް ހޭދަވާ ކަން އަދި، ބައެއް ބާވަތްތަކުގެ މައްސަލާގައި ގިނަ އަދަދެއްގެ ޑިއުޓީ ޝެޑިއުލް ބާއްވަން ޖެހުނަސް، ގިނަ ދުވަސްވުމުން އެ މައްސަލަތައް ޑިއުޓީ ޕްރޮސެކިއުޝަނުން ބޭރުކޮށްލާފައިވާ ކަމަށާއި މިފަދަ މައްސަލަތައް އަވަސްކޮށް ޑިކްލައިން ކުރާ މައްސަލަތައް މަދުކުރަން މަސައްކަތް ކުރަން ޖެހޭ ކަމަށް އޮޑިޓު ރިޕޯޓުގައި ބުނެފައިވެ އެވެ.
އޮޑިޓު ރިޕޯޓުގައި ވަނީ އިސްތިއުނާފު ކުރާ މައްސަލަތަކާ ބެހޭ ފުރިހަމަ މައުލޫމާތު ޕީޖީ އޮފީހުން ލިބެން ނެތް ކަން ފާހަގަކޮށް، ލިޔެކިޔުންތައް ރަނގަޅަށް ބަލަހައްޓައި މި މައުލޫމާތު ފަސޭހައިން އެނގޭނެ ގޮތަކަށް ބެހެއްޓުމަށް ވެސް ލަފާ ދީފަ އެވެ.
އޮޑިޓުގައި މައިގަނޑު ގޮތެއްގައި ބަލައިފައިވަނީ 2018 އިން 2021 ވަނަ އަހަރުގެ ނިޔަލަށް ޕީޖީ އޮފީހުން ދައުވާ ކުރުމާ ގުޅޭގޮތުން ކޮށްފައިވާ މަސައްކަތްތަކަށެވެ. ނަމަވެސް ބައެއް ބައިތަކުގެ ޒާތުން 2022 ވަނަ އަހަރުގެ މަސައްކަތްތަކަށް ވެސް ބަލާފައިވާނެ ކަމަށް އޮޑިޓު އޮފީހުން ބުންޏެވެ.
