ހޯމް މިނިސްޓްރީން ބުނެފައިވަނީ، މި މީޑިއާ ކެމްޕެއިނަށް ތައްޔާރުވުމަށް އިއްޔެ ކަމާ ގުޅުންހުރި ފަރާތްތަކާއި އެކު އޮންލައިން މަސައްކަތު ބައްދަލުވުމެއް ކުރިއަށް ގެންގޮސްފައިވާ ކަމަށެވެ.
އޭގެތެރޭގައި ސަރުކާރުގެ މުއައްސަސާތަކާއި، ޖަމްއިއްޔާތަކުގެ އިތުރުން ގުޅުންހުރި އެހެން ފަރާތްތައްވެސް ހިމެނޭ ކަމަށް މައުލޫމާތު ދީފައިވެ އެވެ. އެގޮތުން ޔޫތް މިނިސްޓްރީ އާއި، އެން.ސީ.ޓީ.ސީއާއި، ބްރޯޑްކާސްޓިން ކޮމިޝަނާއި، އެޑިއުކޭޝަން މިނިސްޓްރީއާއި، ޔޫއެންއާއި، އިސްލާމިކް މިނިސްޓްރީއާއި، ލޭބާ ރިލޭޝަން އޮތޯރިޓީއާއި، ބައެއް މަދަނީ ޖަމްއިއްޔާތައް ހިމެނޭ ކަމަށް މިނިސްޓްރީން ބުނެފައިވެއެެވެ
މަސައްކަތު ބައްދަލުވުމުގެ ކުރިން އިޖުތިމާއީ ބަދަހިކަމާއި، ރާއްޖޭގެ މިހާރުގެ ހާލަތާގުޅޭ ގޮތުން ބައްދަލުވުމުގެ ބައިވެރިންނަށް މައުލޫމާތު ދީފައިވާކަމަށާއި މިމަސައްކަތު ބައްދަލުވުމުގައި 30 ފަރާތެއް ބައިވެރިވެފައިވާކަމަށް ހޯމް މިނިސްޓްރީން ބުނެފައިވެ އެވެ.
މި މަސައްކަތު ބައްދަލުވުން ފައްޓަވައިދެއްވާފައިވަނީ ހޯމް މިނިސްޓަރީގެ ސްޓޭޓް މިނިސްޓަރު މުހައްމަދު މާހިރު އީސާއެވެ. އިއްޔެ ކުރިއަށްގެންދިޔަ މަސައްކަތު ބައްދަލުވުމުގެ ބޭނުމަކީ މިވަގުތު މުޖުތަމައުގައި ހުރި މައްސަލަތަކާމެދު މަޝްވަރާކުރުން ކަމަށާއި މައްސަލަތައް ހައްލުކުރުމަށް ކުރެވިދާނެ ކަންކަމާމެދު ހިޔާލު ބަދަލުކޮށް، މުޖުތަމައުއަށް ދޭނެ މެސެޖްތަކާ ގުޅޭގޮތުން މަޝްވަރާކުރުން ހިމެނޭ ކަމަށްވެސް އެއިދާރާއިން ބުނެއެވެ.
މީގެއިތުރުން މިވަގުތު ދުނިޔެއަށް ކުރިމަތިވެފައިވާ ކޯވިޑް19 އާ ގުޅިގެން ހީނަރުވަމުން އަންނަ އިޖުތިމާއީ ބަދަހިކަމާއި ގުޅިގެން މުޖުތަމައުއަށް ދިމާވާ މައްސަލަތަކާއި، މައްސަލަތައް ހައްލުކުރާނެ ގޮތްތަކާގުޅޭ ގޮތުން މަޝްވަރާކުރެވުނު ކަން ފާހަގަކޮށް މިނިސްޓްރީން ބުނީ، މަޝްވަރާތަކުގެ އަލީގައި މީޑިޔާ ކެމްޕެއިންގެ ތެރެއިން ދޭނެ މެސެޖްތައް ފާހަގަކުރެވިފައިވާ ކަމަށެވެ.
